Гадаад паспортын зураг авах асуудлаас үүдэн нийгэмд багагүй маргаан үүссэн. Үүнтэй холбоотойгоор Баянзүрх дүүргийн Улсын бүртгэлийн хэлтсийн дарга П.Мөнхбаатартай ярилцаж зарим зүйлсийг тодрууллаа. 

-Бүртгэлийн байгууллага гадаад паспортын зургийг өөрсдөө авч иргэдийг чирэгдүүлж байна гэсэн гомдол сүүлийн үед цахим орчинд нэлээн шүүмжлэл дагуулж байна. Энэ талаар?
-Улсын бүртгэлийн Ерөнхий газар, түүний харьяа салбар бүртгэлийн хэлтсүүд  өнгөрсөн есдүгээр сарын 30-ны өдрөөс эхлэн гадаад паспортын зургийг өөрсдөө авч, бүртгэлээ хийж эхэлсэн. Энэ нь иргэд зурагчинд төлбөр төлөхгүй, захиалсан паспорт богино хугацаанд гарах давуу талтай. Учир нь Бүртгэлийн байгууллагын улсын бүртгэгч паспортын зургийг авснаар онлайнаар захиалга үүсэх юм. Өмнө нь паспортын бүртгэлийн захиалгыг цаасан байдлаар хүргэдэг, түгээдэг байсан. Харин одоо  зөвхөн түгээдэг хэлбэрт шилжсэнээр цаг хугацаа, бичиг цаасны зардлуудыг хэмнэж байна.

Иргэд мэдээлэлгүйгээс нэг цэгийн үйлчилгээ гэхээр Дүнжингарав, Мишээл, Драгоныг зорьж ачаалал нэмэгддэг.

-Гадаад паспортын зургийг заавал бүртгэлийн байгууллага өөрсдөө авах шаардлага бий юу, төлбөр тооцоог банканд тушааж дараалал үүсэж байгааг хэрхэн шийдвэрлэж байгаа вэ?
-Гадаад паспортын зургийг авч бүртгүүлэх нь үндсэндээ бүртгэлийн нэг хэсэг гэж ойлгож болно. Төлбөр тооцооны хувьд бид киоск машин,  банканд тушаах хэлбэрүүдээр шийдээд явж байна.

-Гадаад паспортын үйлчилгээг дараалалгүй болгох тал дээр ямар арга хэмжээ авч байгаа вэ?
-Улсын бүртгэлийн байгууллага нь нийслэл дэх 9 дүүрэг түүний харьяа нэг цэгийн үйлчилгээний салбарууд мөн Баянзүрх дүүргийн хэмжээнд улсын бүртгэлийн гурван нэг цэгийн үйлчилгээ нээсэн. Батлан хамгаалах их сургуулийн замын урд төр захиргааны хоёрдугаар байр, Жанжин клуб, Дарь эх нэг цэгийн үйлчилгээ гэсэн улсын бүртгэлийн гурван нэг цэгийн үйлчилгээн дээр авч байгаа. Мөн Баянзүрх дүүргийн 1-дүгээр хороо, 4 дүгээр хороон дээр гадаад паспорт авч байна. Түүнчлэн орон нутагт гадаад паспортын үйлчилгээгээ нэгэн зэрэг үзүүлээд явж байна. Гадаад паспортын ачаалал харьцангуй бага, бүртгэл хэвийн явагдаж байна. Иргэддээ хандаж хэлэхэд  E-Mongolia-гаар гадаад паспорт захиалах боломжтой болсон. Та бүхэн дээрх цэгүүдээр мөн E-Mongolia-р үйлчилгээ авч байгаарай гэж захья. 

-Дүнжингарав салбар дээр нэг зурагчин байгаа нь ачаалал үүсгэж иргэдийг бухимдуулж байна. Зурагчнаа нэмэх боломжтой юу?
-Иргэд мэдээлэлгүйгээс нэг цэгийн үйлчилгээ гэхээр Дүнжингарав, Мишээл, Драгоныг зорьж ачаалал нэмэгддэг. Тухайлбал, Баянзүрх дүүрэгт дөрвөн газарт захиалах боломжтой. Өдөрт 350-400 хүн гадаад паспорт захиалж байгаагаас Дүнжингарав салбарт 150-250 гаруй хүн захиалга өгч байх жишээтэй. Харин “Дарь эх, Төр захиргааны хоёрдугаар байр, Жанжин клубт улсын бүртгэлийн үйлчилгээ үзүүлж байгаа ч хүн багатай ажиллаж байна. Иргэд ганц газар цаг алдан хүлээж суух биш дээрх нэг цэгийн үйлчилгээнээс эд хөрөнгө, гадаад паспорт гэсэн улсын бүртгэлтэй холбоотой үйлчилгээг авах боломжтой.

-Гадаадаас болон орон нутгаас хэрхэн захиалга өгөх вэ?
-Гадаадад суугаа иргэн тухайн газрын Элчин болон консул дээр очиж зураг даруулан системдээ бүртгүүлж захиална. Харин хүндэтгэх шалтгаантай иргэд эмчийн бичиг, итгэмжлэлээ үзүүлж мэргэжлийн зурагчнаар сүүлийн зургаан сарын дотор авхуулсан, цагаан фонтой, чих дух ил гарсан цээж зургийг тухайн газрынхаа Улсын бүртгэлийн хэлтэст өгч захиалах юм. Хөдөө орон нутгийн иргэд ч мөн адил Улсын бүртгэлийн хэлтэст  очиж зураг даруулан бүртгүүлж захиална. Хүсвэл Улаанбаатарт ирж захиалах боломжтой. Өмнө нь алслагдмал газраас захиалаад шуудангаар хүргүүлэхэд хүлээгддэг байсан. Харин одоо гадаад паспортоо гар дээрээ авах хугацаа багасаж 3-5 хоногт гардаг болох юм. Орон нутгийн иргэд зардал, цаг хугацаа хэмнэж байна.

Эх сурвалж: БЗД