Монгол Улсын 21 аймгаас Дархан-Уул, Дорнод, Дорноговь, Өмнөговь, Сэлэнгэ, Орхон аймаг улсын төсөвт орлого төвлөрүүлдэг. Бусад нь улсын төсвөөс татаас авч байна. Цаашид аймаг бүр орлогоо бие даан бүрдүүлэхэд чиглэсэн хөрөнгө оруулалтыг Засгийн газар бодлогоор дэмжих болжээ.

Ингэхдээ орон нутаг төсвөө бие даан бүрдүүлэхэд нэн шаардлагатай томоохон төсөл хөтөлбөрүүдийг орон нутгийн иргэдийн оролцоонд тулгуурлан шийдвэрлэнэ.

Цаашид аймаг, дүүргүүд Эдийн засгийн хөгжлийн яам, холбогдох бусад яамдтай хамтарч, орон нутгийн төсвөө бие даан бүрдүүлэхэд шаардлагатай төслүүдийн зураг төсөл, бэлтгэл ажлыг хангах юм байна.

Гэвч  манай улс анх удаа 2023 оны төсөвт шинэ хөрөнгө оруулалтыг хязгаарлаж, өмнө эхлүүлсэн төслүүдийг л үр ашигтай дуусгах болсон. 2023 онд өмнө нь эхлүүлсэн нийт төслийн 86 хувийг бүрэн дуусгаж, ашиглалтад оруулна.

Нийслэлийн төвлөрлийг бууруулах зорилгоор ирэх оноос эхлэн орон нутагт ажиллаж буй төрийн захиргааны болон тусгай албан хаагчдын цалинг 100 хувь нэмнэ. Энэ нэмэгдлийн 20 хувийг улсын төсвөөс, үлдсэн 80 хүртэлх хувийг орон нутгийн төсвөөсөө санхүүжүүлэх эрхтэй болжээ. Ингэснээр Өмнөговь гэх мэт орлого өндөртэй аймгийн төрийн албан хаагчдын цалин 68 хүртэл хувиар өсөх боломжтой.   

Орон нутгаас суралцаж байгаа оюутнуудын замын зардлын хөнгөлөлтийг улсын төсвөөс олгодог. Үүнд нэг тэрбум төгрөг төсөвлөжээ. Орон нутагт хөдөлмөр эрхлэлтийг дэмжих зорилгоор Засгийн газраас санаачлан батлуулсан Аж ахуйн нэгжийн орлогын албан татварын тухай хуульд нэмэлт, өөрчлөлт оруулах тухай хууль нь ирэх оноос хэрэгжиж эхэлнэ.

Уг хуулийн хүрээнд дулаан, цахилгаан үйлдвэрлэх шинэ төсөлд орлого олж эхэлснээс хойш 3 жилийн хугацаанд 90 хувиар, дараагийн гурван жилийн хугацаанд 50 хувиар татварын хөнгөлөлт үзүүлнэ.

Улмаар нийслэлээс орон нутагт үйлдвэр, агуулахаа нүүлгэсэн, орон нутагт шинээр үл хөдлөх хөрөнгө бий болгосон, орон нутагт ажлын байр нэмэгдүүлсэн аж ахуйн нэгжүүдэд татварын дэмжлэг үзүүлэх юм байна.