Оросын пуужин Украины Кременчуг хотын Полтав мужийн "Амстор" сүлжээний худалдааны төвд унажээ. Тус худалдааны төвд 16 хүн амиа алдаж, олон арван хүн шархадсан байна. Ерөнхийлөгч Володимир Зеленський тус төвд 1000 гаруй хүн байсан гэж мэдэгдэв. 

Полтав мужийн тамгын газрын дарга Дмитрий Лунин 40 гаруй хүн гэмтэж бэртсэн тухай мэдээлжээ. Мөн пуужингийн цохилтын дараа Кременчугт сураггүй алга болсон хүмүүсийн талаарх 40 гаруй дуудлага мэдээлэл ирсэн гэж Украины Ерөнхий прокурор мэдэгдэв. Прокурорын газрын мэдээллээр 59 хүн түлэгдэж, бэртсэн бөгөөд тэдний тал хувийнх нь биеийн байдал хүнд байгаа аж.

Ерөнхийлөгч Володимир Зеленський "Европын түүхэн дэх хамгийн аймшигтай террорист ажиллагаануудын нэг боллоо" гэжээ.

АНУ-ын Төрийн нарийн бичгийн дарга Энтони Блинкен "Өнөөдөр Украины хөл хөдөлгөөн ихтэй худалдааны төв рүү Орос пуужингийн цохилт өгсөн нь дэлхий нийтийг айдаст автуулж байна" хэмээж, Украиныг үргэлжлүүлэн дэмжиж, Орост хариуцлага тооцох болно гэв.

Их Британийн Ерөнхий сайд Борис Жонсон "Энэ цохилт ОХУ-ын Ерөнхийлөгч Владимир Путиныг ямар харгис хэрцгий болохыг харууллаа" гэжээ.

Эх сурвалж: ВВС