Дэлхийн хүн амын тэн хагасыг бүрдүүлдэг эмэгтэйчүүдийн дуу хоолойг хэвлэл мэдээллээр маш бага хүргэдгийг Та мэдэх үү?

Олон улсын хэвлэл мэдээллийн мониторингийн (Global Media Monitoring Project (GMMP)) үр дүнгээс үзэхэд хэвлэл мэдээллээр гарч байгаа дөрвөн хүн тутмын нэг нь л эмэгтэй байна. Мөн эмэгтэйчүүдийг ихэвчлэн ээжийн үүргээр дүрсэлдэг бөгөөд улс төр, эдийн засаг зэрэг салбарт мэргэжлийн байр суурийг нь хүргэх тохиолдол хангалтгүй байгаа юм. Байдал энэ чигээр үргэлжилбэл мэдээний агуулгаас жендэрийн тэгш байдлыг харахын тулд дор хаяж 67 жил хүлээх хэрэгтэйг судлаачид анхааруулдаг.

Гэвч бид тэр цагийг хүлээж, зүгээр суухгүй. Мэдлэг, боловсролоороо манлайлдаг монгол эмэгтэйчүүдийнхээ байр суурь, үзэл бодлыг уншигчдадаа хангалттай сайн хүргэх нь манай контентыг илүү үнэ цэнтэй болгоно гэж GOGO.mn үзэж байна. Мөн хүний эрх, жендэрийн эрх тэгш байдлыг хангахад анхаарч, нийгмийг чиглүүлэх, түүчээлэх үүргээ гүйцэтгэх нь манай редакцын бодлогын салшгүй чухал хэсэг билээ. Тиймээс ч бид “ТЭНЦВЭР” санаачилгыг эхлүүлж, бодлого, үйл ажиллагаандаа шинэчлэл хийж байгаагаа мэдэгдэж байна. Энэ хүрээнд хийж байгаа ажлаа эрхэм уншигчдадаа танилцуулъя.

БИД НЭГ АЛХАМ УРАГШИЛЛАА

Хэвлэл мэдээллийн зөвлөлөөс өнгөрсөн онд хийсэн судалгаанаас үзэхэд өдөр тутмын сонин, сайтуудын улс төрийн мэдээний арван эх сурвалж тутмын ганц нь л эмэгтэй байна.

Тэгвэл Хэвлэл мэдээллийн зөвлөлийн төслийн баг GoGo.mn сайтын контентод  /мэдээ, нийтлэл, ярилцлага, сурвалжилга/-д мониторинг хийхэд нийт эх сурвалжийн 30 гаруй хувийг л эмэгтэйчүүд бүрдүүлж байв. Тиймээс ч бид мэдээллийн агуулгадаа жендэрийн эрх тэгш байдлыг бүрдүүлэх зорилгоор “Мэдрэмжтэй мэдээлье” редакц чадавхжуулах, менторшип хөтөлбөрт хамрагдсан юм. Энэхүү хөтөлбөрийн хүрээнд бид Хэвлэл мэдээллийн зөвлөлийн сургагч багш нараас гурван өдрийн сургалт авч, редакцын хамт олныхоо жендэрийн мэдрэмжтэй байдлыг сайжрууллаа.   

Мөн олон улсын Интерньюс байгууллагын “Reflect Reality” санаачилгын нөөц хэрэглэгдэхүүн болох эх сурвалжийн бүртгэлийн хуудсыг хөтөлж эхлээд байна. Үүний үр дүнд хөтөлбөр эхлэхэд эмэгтэйчүүд нийт эх сурвалжийн 30 хувийг бүрдүүлж байсныг 38 хувь хүртэл нэмэгдүүлээд байна. Бид эх сурвалжийн хүйсийн тэнцвэрт байдлыг хангах үүднээс үүнийг 40 хувьд хүргэх зорилготой ажиллаж байгаа юм.

БИД ОЛОН УЛСЫН ХӨДӨЛГӨӨНД НЭГДЭЖ БАЙНА

Нийгэм, эдийн засаг, бизнесийн гээд бүхий л салбарт дэлхий нийт жендэрийн эрх тэгш байдлыг чухалчилж буй.  Дэлхийн томоохон редакцууд ч үйл ажиллагаандаа энэ төрлийн хэв маягийг нэвтрүүлж эхлээд байна. Жишээ нь “BBC: 50:50 The Equality Project” /Тэгш байдал төсөл/, “Bloomberg: New voices” /Шинэ дуу хоолой/ зэрэг төслийг дурдаж болно.

GoGo.mn BBC-гийн 50:50 төсөлтэй албан ёсоор түншилсэн Монголын анхны мэдээллийн сайт болсноо дуулгахад таатай байна. Энэхүү түншлэлийн хүрээнд бид BBC өөрийн контентод эмэгтэйчүүд төдийгүй үндэстний болон бэлгийн цөөнх, хөгжлийн бэрхшээлтэй хүмүүсийн дуу хоолойг амжилттай нэмэгдүүлэхдээ хэрэглэсэн аргачлалыг нэвтрүүлэн ашиглахаар төлөвлөж байна. Бид эх сурвалжийн хүйсийн тэнцвэрт байдлыг мэдээ, нийтлэлдээ төдийгүй цаашлаад зурган өгүүлэмжид ч хангахыг эрмэлзэж байна.

Баталгаатай бөгөөд сонирхолтой эх сурвалж болохуйц эмэгтэй мэргэжилтнүүд хөшигний цаана ихэвчлэн үлдэж байсан. Харин одоо энэ байдлыг халж тэднийг “тайзан” дээр гаргаж ирэн үг хэлэх боломжийг бид олгох хэрэгтэй. Нийгмийн нэг талыг бүхэлд нь төлөөлж байгаа эмэгтэйчүүдийн үгс, дуу хоолойг бусадтай эн тэнцүү түгээх зорилготой бидний санаачилга амжилттай хэрэгжихэд BBC-гийн 50:50 төсөл дэм болно гэдэгт итгэлтэй байна.

"БИД ЖЕНДЭРИЙН ЭРХ ТЭГШ БАЙДЛЫГ ЧУХАЛЧИЛНА"

Жендэрийн талаар дурдахад энэ нь зөвхөн эмэгтэйчүүдийн талаар л өгүүлж, тэдний эрх ашгийг хамгаалсан мэдээ мэдээлэл түгээх нэг арга хэрэгсэл хэмээх хэвшмэл бөгөөд өрөөсгөл ойлголт олон нийтийн дунд түгээмэл байдаг. Тийм биш юм. Угтаа бол энэ нь хүйсийн тэгш байдал буюу ямар ч тохиолдолд, хэзээ ч, хаана ч, бүр ямар ч платформ, аль ч салбарт эрэгтэй, эмэгтэй хүний эрх, оролцоо, үүрэг, хариуцлага ижил тэгш байхын нэр билээ.

Тиймээс жендэрийн тулгамдаж буй асуудлыг бодит баримттайгаар олон нийтэд мэдээлж, шийдвэр гаргагчдын түвшинд хүргэн тэдний анхаарлыг хандуулж, тодорхой өөрчлөлтийг хийх цаг нь ирсэн.

Энэ бол зөвхөн нэг редакцын зорилго байгаад зогсохгүй хэвлэл мэдээллийн салбарын бусад байгууллагын үйл ажиллагааны нэг чиглэл болсноор илүү амжилттай хэрэгжих боломжтой билээ.

Бид цаашлаад цөөнх, хөгжлийн бэрхшээлтэй бүлгийн дуу хоолойг хүргэх бөгөөд дээрх санаачилгын хүрээнд бусад редакцтай туршлагаа хуваалцаж, хамтрахдаа нээлттэй байх болно.