Сагсан бөмбөгийн Үндэсний Дээд лигийн плей-оффын тоглолтууд үргэлжилж байна. Өчигдөр UG Arena-д гал гарсан гурван тоглолт болж хүснэгтийн харьцаа өөрчлөгдөв.

Цувралд хоцорч явсан Завхан Бродерс энэ өдрийн төгсгөлд М Гарьд багийг 97-89 харьцаагаар хожиж цувралыг тэнцүүллээ. Тус тоглолтод Э.Дөлгөөн 24 оноо, 12 самбартай double-double толилуулж багаа тэргүүлсэн бол Д.Мөнхтүвшин 18 оноо, Даймонд Стөүн 18 оноогоор туслав.

Харин энэ тоглолтын өмнө цувралд илүүрхээд эхэлсэн Тэнүүн Өлзий Металл баг Архангай Алтан Дорнодын Дайчдыг 81-77 харьцаагаар хожсоноор хагас шигшээд шалгарахад нэг алхам ойртлоо.

Металлаас Кристофер Блейк 21 оноо, 10 самбартай double-double хийж хожилд гол нөлөөг үзүүлсэн бол Т.Ууганбаяр 18 оноо, Д.Дэлгэрням 10 оноогоор туслав.

Эмэгтэй финалын тоглолт ойртсоор. Улаанбаатар Амазонс баг финалын эрхээ авсны маргааш М Гарьд баг эрхээ авах боломжтой байв. Гэвч Эрдэнэтийн Уурхайчид амар бууж өгөхийг хүссэнгүй. Тэд 62-59 харьцаагаар хожиж цувралыг 2-1 болгон ойртууллаа.

Багийн легионер Жералдин Леапепе 24 оноо, 10 самбартай double-double хийсэн бол У.Содцэцэг 10 оноо, У.Уянга 10 самбараар багтаа туслав.