Жинхэнэ амар амгалан гэдэг асуудалгүй, бүх зүйл бүрэн эв зохицолтой байхын нэр биш. Харин гадна орчинд, эргэн тойронд юу ч болж байлаа сэтгэлийн амар амгалангаа хадгалж чадах чадварыг хэлдэг ажээ.

Гэвч бид сэтгэлийн амар амгаланг эрэлхийлэвч  өдөр тутмын асуудлууд хэрэгтэй, хэрэггүй, эерэг, сөрөг түм буман бодлууд амар тайван байдлыг алдагдуулж орхидог. Энэ дунд өөрийгөө ч анзаарах сөхөөгүй болтлоо будилсан хэрнээ бусдын өөг андалгүй харж, дэвэргэн, хийсэн алдаанд нь баярлах шахам байгаа нь өнөөдрийн нийгмийн нэг өнгө юм. Хэрэв та энэ бүхнээс хичээгээд ч салж чадахгүй, амар амгаланг олохгүй байвал зүгээр л аялж, нуурын эргийг зорихыг зөвлөе.

Нуурын эрэг танд эрээд хайгаад олохгүй байгаа тэрхүү амар амгаланг мэдрүүлнэ. Хязгаар нь үл харагдах цэлгэр хөх нуурыг хараад өөрийн эрхгүй элдэв бодлоо мартагнаж, зөөлөн долгиолох усны чимээнд тархи амарна. Ялангуяа нуурын эргийн нар жаргах, мандах үеийн өнгө төрх мэлмийг баясгана. Нэгээс нөгөөд яарсан завгүй энэ амьдралд хэсэгхэн ч гэсэн өөртөө зав гаргаж, нуурын эргийн амар амгаланг мэдрэх нь энэ амьдралын бас нэгэн үнэ цэнэ биз ээ. 

Байгаль далай хараа булаам юм аа, хараад л зогсоод баймаар. Гэхдээ зөвхөн надад л тэгж санагдсан ч байж магадгүй. Эргийн нь чулуу зөөлхөн, агаар нь ер бусын цэнгэг аж. 

Орой нар шингэх алдад бид нуурын эрэг хавцал руу явцгаасан бөгөөд энэ үеийн байгалийн сайхныг хэзээ ч мартахгүй байх.

Өглөөний мандах нар нуур байгалийг улам гэрэлтүүлж, байгаль дэлхий гэдэг ямар гайхамшигтайг нэгэн удаа харуулах болно. 

Нийтлэлийг бичсэн: Б. Янжиндулам

Эх сурвалж: Joinme.mn