Улс орны түүхэн хөгжлийн явцад эргээд харахад сонирхолтой боловч мартаж боломгүй дурсгалтай зүйлс цөөнгүй. Социализмын гэх нийгмийн нэгэн үеийг туулж өнгөрүүлсэн нь бидний хувьд сайн, муу элдвийг л дагуулсан. Гэвч өдгөө сайн муу хэмээн түүхийг дүгнэн суухаас илүүтэй эргэн дурсаж шаардлагатай бол суралцаж, сургамж авах нь зүй мэт. 

Түүх цаасан дээр бууж үе дамжин үлдэхийн сацуу гэрэл зургийн хальснаа буусан байх нь баримт агуулж, ихийг өгүүлнэ. “Хамаг бүхэн бороо мэт арилж, харин гэрэл зураг шороо мэт үлдэнэ” гэдэгчлэн энэ удаа бид та бүхэнд 20-р зууны үеийн түүхэн гэрэл зургуудыг өөрийн биеэр авч ирсэн ахмад гэрэл зургийн сурвалжлагч Л.Санжмятав гуайн авсан фото зургуудыг сонирхуулъя. 

Л.Санжмятав нь 1957 оны намар Төмөр замын намын хорооны дэргэд байгуулагдсан Найрамдлын зам сонинд гэрэл зурагчнаар 19 настайдаа орж байжээ. 1958 оны нэгдүгээр сарын 1-нд Найрамдлын зам сонин анхныхаа дугаарыг гаргаж байлаа. Энэ сониндоо таван жил ажиллаж, 1962 онд МУИС-ийн сэтгүүл зүйн ангид орж, сэтгүүлч болжээ. Дараа нь МРТУХ (Мэдээлэл радио телевизийн улсын хороо) гэж байхад Үйлдвэрийн редакцид сурвалжлагчаар 2 жил ажиллаж, МОНЦАМЭ-гийн гэрэл зургийн редакцид хориод жил болсон байна.