Эрүү шүүлтийн үндэсний ажиллагаанаас Сэтгэцийн эрүүл мэндийн төвд хийсэн хяналтын талаар мэдээлэв.  Мөн ЭМЯ-наас 11 хүний бүрэлдэхүүнтэй ажлын хэсэг гарч тус төвд хяналт шалгалт явуулжээ. 

Энэ үеэр ЭМЯ-ны Нийтийн Эрүүл мэндийн газрын дарга Д. Баярболд “Сэтгэцийн Эрүүл мэндийн төвд байнга хэвтэн эмчлүүлэгч 232 иргэн байдаг. Үүнээс 181 иргэний тэтгэвэр тэтгэмжийг ар гэрийн хүмүүс авдаг. Харин 51 иргэний тэтгэвэр тэтгэмжийн зарцуулалтад СЭМҮТ-ийн нийгмийн ажилтан хяналт тавьдаг.  Уг иргэдийн банкны карт нийгмийн ажилтанд байдаг байна.

2003 онд Мааньтын Сэтгэцийн эрүүл мэндийн төв татан буугдсан. Тус төвд байнгын хэвтэн эмчлүүлдэг байсан 300 хүн  СЭМҮТ-рүү шилжиж ирсэн. Эдгээр хүмүүсийн 7 нь хаанаас ирсэн, хэн гэдэг, хэзээ төрсөн нь мэдэгдэхгүй, тодорхойгүй өнөөг хүртэл СЭМҮТ-ийн харьяанд байна.  

Урт хугацааны сэтгэцийн тодорхойгүй эмгэг оношийн хамааралтай бүлгийн F99 өвчнийг хэвтэн эмчлэх, эмийн эмчилгээний тусламж үйлчилгээний зардлыг эдийн засгийн инфляцтай уялдуулж жилд нэг хүний зардал 22 сая төгрөгийг улсын төсвөөс санхүүжүүлэн дэмжлэг үзүүлэх боломжтой зөвлөгөөг СЭМҮТ-д хүргүүлсэн. 2024 оны нэгдүгээр сарын 1-ээс эхлэн тус санхүүжилт олгогдож эхэлсэн байна.  

Мөн сэтгэцийн архаг урт хугацааны эмчлүүлэгсэд сүрьеэ болон бусад өвчнөөр өвчилсөн тохиолдолд эрүүл мэндийн тусламж үйлчилгээний зардал дээр нэмэлтээр эрүүл мэндийн даатгалын сангаас олгодог болгох гэсэн зөвлөмжийг хүргүүлж сүрьеэгийн тусламж үйлчилгээг 100 хувь улсаас олгодог болжээ.  

Хяналт шинжилгээний дүнгээс дурдвал удирдах ажилтнууд албан тушаалын тодорхойлолтод тавигдах шаардлагыг хангаж байгаа эсэхэд:

• Албан хаагчийн албан тушаалын тодорхойлолтод заасан мэргэжлийн чиглэл индекс нь тухайн ажлын байранд ажиллаж байгаа албан хаагчийн боловсролын мэргэжлийн индекстэй уялдаагүй байна.  
• Төвийн дотоод бүтэц үндсэн чиглэл ажиллах орон тоог 2023 онд шинэчлэн баталсан боловч ажлын байрны албан тушаалын тодорхойлолтыг шинэчлээгүй байна.  
• Зарим удирдах албан тушаалд сонгон шалгаруулалтгүйгээр томилсон сул орон тооны зар  мэдээллийг байршуулаагүй нь журмыг зөрчжээ.