3х3 сагсан бөмбөгийн үндэсний шигшээ багийн тамирчид өнөөдөр  Төрийн ордонд шагналаа гардан авав.

Ерөнхий сайд Г.Занданшатар ард түмнээ эв нэгдэлд хөтөлж, эх орноо олон улсад сурталчлан таниулахад онцгой гавьяа байгуулж, түүхэн амжилт гаргасан тул  Монгол Улсын Ерөнхий сайдын нэрэмжит мөнгөн  шагнал олгож байгаагаа онцлоод 2028 оны олимпод өндөр амжилт үзүүлнэ гэдэгт итгэлтэй байгаагаа илэрхийлэв.

Монголчууд багийн спортоор амжилт гаргадаг гэдгийг олон улсад батлан харуулсан тамирчид, багийн дасгалжуулагчид, арын албаныханд мөн талархал илэрхийллээ. Энэ үеэр Соёл, спорт, аялал жуулчлалын сайд Ч.Ундрам дараах мэдээллийг өгөв.

-2020 онд Монгол Улсын шигшээ багийн бүрэлдэхүүнд 3х3 сагсан бөмбөгийн төрлийг оруулсан. Үүнээс хойш баг тамирчдаа олон улсын тэмцээнд явахад нь замын зардал гэх мэтээр тодорхой дэмжлэг үзүүлсэн. Энэ багт зориулан өнөөдрийг хүртэл хоёр тэрбум төгрөгийн дэмжлэг үзүүлжээ. Өнөөдөр Ерөнхийлөгч У.Хүрэлсүх багийн дөрвөн тамирчин болон дасгалжуулагчид төрийн дээд одон медаль гардуулав. Мөн Ерөнхий сайд Г.Занданшатар холбогдох хууль журмын дагуу 500 сая төгрөгийн урамшуулал өглөө. 

Улаанбаатар хотын захирагч дөрвөн тамирчин тус бүрд 150 сая төгрөгийн орон сууцны гэрчилгээ олголоо. Салбар яамнаас дасгалжуулагчид нэг удаагийн 50 сая төгрөг, тамирчин тус бүрд 25 сая төгрөгийн урамшуулал олгоно. 2026.01.01-нээс эхлэн дөрвөн тамирчин сар бүр нэг сая төгрөгийн урамшууллыг насан туршдаа авна. 

Бид цаашид олимпын төрөлд багтсан спортын тамирчдаа Ази, дэлхийн аваргын тэмцээнд явахад нь батлагдсан төсвийн хүрээнд дэмжлэг үзүүлнэ" гэв.