Агаарын бохирдлыг бууруулах Үндэсний хорооны ээлжит хуралдаан өнөөдөр /2025.07.09/ боллоо. Хурлыг Байгаль орчин, уур амьсгалын өөрчлөлтийн сайд, Агаарын бохирдлыг бууруулах Үндэсний хорооны дарга Б.Батбаатар удирдаж, гурван асуудал хэлэлцлээ.

Ажлын албаны дарга С.Даваасүрэн Агаарын бохирдлыг бууруулах Үндэсний хорооноос хэрэгжүүлж буй ажлыг танилцуулсан юм. Тэрбээр мэдээлэлдээ “Газком” ХХК, “Горгаз” ХХК зэрэг хувийн хэвшилтэй хамтран нийслэлд үйл ажиллагаа явуулдаг 100 кВт-аас дээш хүчин чадалтай халаалтын зуухуудыг хийн түлшинд шилжүүлэх ажил үргэлжилж байгааг танилцуулав.

Одоогийн байдлаар хувийн хэвшлийн хөрөнгө оруулалт, ААНОАТ-ын хөнгөлөлтөөр 20 том зуухыг шинэчлэхэд бэлэн болоод байгаа бөгөөд цаашид Ногоон зээлийн санхүүжилтийг шийдвэрлэх нэн шаардлагатай байгааг онцоллоо.

Мөн хуралдаанд ШУА-ийн Хими, химийн технологийн хүрээлэнгийн захирал, профессор Л.Жаргалсайхан Эрдэнэс Тавантолгой ХК-ийн тэг давхаргын баяжмал, түүнд тохирсон барьцалдуулагч бодисыг сонгох туршилт, судалгааны ажлын үр дүнг танилцуулав.
Судалгааны дүгнэлтэд нүүрсэн шахмал түлшинд хамгийн тохиромжтой түүхий эд нь хагас кокс бөгөөд хагас коксоор шахмал түлш хийснээр хүхрийн болон нарийн ширхэгт тоосонцрын РМ2.5, РМ10 хэмжээг багадаа 50 хүртэл хувиар бууруулах боломжтойг дурдаж, тэг давхаргын баяжмалыг шахмал түлшний түүхий эд болгон шууд ашиглахгүй байхыг зөвлөлөө.

Үүнээс гадна НАОБТГ-ын дарга Д.Мөнхбаатар гэр хорооллын айл өрхийг хийн түлшинд шилжүүлэх ажлын явцын талаар мэдээлэл өгч, 2025-2026 онд нийслэлийн таван хорооны 5000 айл өрхийг дулаалж, хийн халаагуурт шилжүүлэхээр төлөвлөж байгааг танилцуулсан юм.
Хуралдааны төгсгөлд БОУАӨ-ийн сайд, Агаарын бохирдлыг бууруулах Үндэсний хорооны дарга Б.Батбаатар “Төрийн байгууллагууд утаа “үйлдвэрлэх”-ээ зогсоох хэрэгтэй байна. Энэ бол агаарын бохирдлыг бууруулах эхний алхам. Эхлээд төрийн байгууллагууд зуухаа шинэчилж, утаагаа зогсоочихоод иргэдэд шаардлага тавих нь зүй ёсны хэрэг. Бид эрүүл, аюулгүй орчинд амьдрах нэг л зорилготой” гэв. 

Эх сурвалж: БОУАӨЯ