АНУ-ын ерөнхийлөгч Дональд Трамп пүрэв гарагт хийсэн мэдэгдэлдээ өмнөх ерөнхийлөгч Жо Байденыг Украинд хэрэгтэй зэвсгийг нь нийлүүлээгүй хэмээн шүүмжлэв. 

Тодруулбал тэрбээр өөрийн цахим сүлжээнд "Халдагч улсынхаа эсрэг довтлохгүйгээр дайнд ялах ямар ч боломжгүй" хэмээгээд Жо Байденыг Украинд зөвхөн өөрсдийгөө хамгаалах зэвсэг л өгсөн, эргэж довтлох хангалттай зэвсгээр хангаагүй гэсэн юм. 

Мөн тэрбээр тухайн үед өөрийг нь ерөнхийлөгч байсан бол энэ дайн болох ямар ч боломжгүй байсан гэжээ. 

Трамп Путин, Зеленський болон Европын удирдагчидтай уулзсаны дараа Украины аюулгүй байдлын баталгааны асуудал хөндөгдсөн. 

Мөн тэрбээр Путин болон Зеленський нарын дунд уулзалт зохион байгуулна гэж байв. Гэхдээ энэ талаар Оросын талаас тодорхой хариу өгөхгүй байсаар байна. 

Сүүлд Оросын талаас Украины баруун хэсэгт агаараас довтолсон ба энэ нь сүүлийн үед Оросоос хийсэн хамгийн том довтолгоонуудын нэг болжээ. 

Энэ дайралтад Украин дахь АНУ-ын хөрөнгө оруулалттай цахилгаан барааны үйлдвэр өртсөн тухай Зеленський мэдээлсэн. 

Харин Оросын талаас энэ дайралтаараа Украины зэвсгийн үйлдвэрүүдийг онилсон гэж мэдэгдсэн. 

Эх сурвалж: АР