Аймаг, нийслэл, сум, дүүргийн иргэдийн Төлөөлөгчдийн Хурлын 2026 оны нөхөн сонгууль 6 дугаар сарын 21-ний өдөр болно.

Сонгуулийн ерөнхий хорооноос энэ жил нөхөн сонгууль товлон зарласан аймаг, сумдын Сонгуулийн хороо, Мэдээллийн технологийн багтай өнөөдөр (2026.04.24) цахимаар хуралдлаа.

Цахим хуралд Сонгуулийн ерөнхий хорооны Тамгын газрын дарга Д.Бат-Эрдэнэ, Тамгын газрын газар, хэлтэс, Мэдээллийн технологийн газрын холбогдох албан хаагчид оролцон Аймаг, нийслэл, сум, дүүргийн иргэдийн Төлөөлөгчдийн Хурлын 2026 оны нөхөн сонгуулийн зохион байгуулалтын талаар мэдээлэл солилцож, арга зүйн зөвлөмж өгсөн юм.

Сонгуульд нэр дэвшигчдийг бүртгэх, сонгуулийн мэдээллийн цахим систем (https://e-election.mn/) ашиглах болон сонгогчдын идэвх оролцоог нэмэгдүүлэх зэрэг чиглэлээр арга зүйн зөвлөмж өгч, сонгуулийн хорооны гишүүдийн асуултад хариуллаа.

Сонгуулийн ерөнхий хороо сонгууль зохион байгуулахад байнгын бус ажиллагаатай сонгуулийн байгууллагад ажиллаж буй төрийн албан хаагчдад томилолт, цахимаар сургалт, мэдээлэл хийдэг уламжлалтай. Энэ жил сонгуулийн хорооны ажилтнуудаас гадна улс төрийн намын анхан болон дунд шатны байгууллагуудад мэдээлэл, сургалт хийнэ.

Аймгийн сонгуулийн хороодод сонгууль зохион байгуулах, улс төрийн намуудад Улс төрийн намын тухай хуулийн хэрэгжилтийг хангах чиглэлээр нөхөн сонгууль товлон зарласан 16 аймагт мэдээлэл, сургалт хийх баг энэ сарын 27-ны өдрөөс аймгуудад ажиллах юм.

Харин сумын сонгуулийн хороодод зориулсан орон нутаг дахь сургалт тавдугаар сарын 3-аас эхэлнэ.