Их Британийн Ерөнхий сайд Кэйр Стармэр "Израил ямар нэг арга хэмжээ авахгүй бол ирэх есдүгээр сард Палестин Улсыг хүлээн зөвшөөрнө" гэжээ.

НҮБ-ын Ерөнхий ассамблэйн хурал ирэх есдүгээр сард болно. Үүнээс өмнө хэд хэдэн шаардлагыг Израил биелүүлэхгүй ёстой гэв. 

Эдгээр нь урт хугацаатай, энхийн үйл явцыг эхлүүлэх, хоёр улс зэрэгцэн орших хэлэлцээрт хүрэх, Газын зурвас дахь аймшигтай нөхцөл байдлыг зогсоохын тулд арга хэмжээ авах, Баруун эргийг эзлэхгүй гэж амлах юм. 

Их Британийн Ерөнхий сайд "Израил, Палестин улсууд зэрэгцэн, аюулгүй орших нь бидний зорилго. Газын зурваст олон сая хүн өлсөж зовж байгааг тэвчих аргагүй. Бидний найдвар тасарч байгаа тул энэ мэдэгдлийг хийж байна. Хамас барьцааны иргэдийг суллаж, Израил хүмүүнлэгийн тусламжийг нэвтрүүлж, талууд гал зогсоох ёстой. Энэ бүхний дараа байгуулагдах шинэ Засгийн газарт Хамас багтахгүй бөгөөд тэднээс зэвсгээ орхихыг шаардана" гэжээ.

Их Британийн Ерөнхий сайд Ажилчдын намыг удаан хугацааны турш удирдаж байна. Тус нам Палестиныг тусгаар улс гэж хүлээн зөвшөөрөх ёстой. Ингэснээр зөрчилдөөнийг зогсоож чадна гэж үздэг.    

Францын Ерөнхийлөгч Эммануэл Макрон мөн Палестиныг тусгаар улс гэж тунхаглана гэдгээ өнгөрсөн долоо хоногт зарласан. Гэхдээ тэрээр Израилд ямар нэг болзол тулгаагүй.

Дээрх мэдэгдлийн дараа Израилийн Гадаад хэргийн яам богино мэдэгдэл гаргаж, "Их Британи Хамасыг илүү шагнаж байна. Энэ мэдэгдэл бидний гал зогсоох хүчин чармайлтад сөрөг нөлөөтэй" гэжээ.

Эх сурвалж: BBC