Сэтгүүлч, "МN 25 дугаар суваг" телевизийн захирал З.Алтай УИХ-ын сонгуульд бие дааж нэр дэвших болсон тухайгаа өчигдөр мэдэгдлээ. Тэрбээр Баянзүрх дүүргийн тойргийг сонгожээ. "Зүтгээд үзье, цаг нь болжээ" гэж эрс шийдэмгий хэлээд яагаад ямар нэг намаас биш, бие дааж өрсөлдөх шийдвэр гаргасан тухайгаа "Намын нэр барьсан нөхдүүдтөр болж тоглохыг 16 жил харлаа, тэвчихгүй нь. Хүнд чинь ичиж зовох, сэтгэл өвдөх гэж байдаг. Гэтэл энэ олигархиудад тэр бүхний үнэр ч алга. Хэтэрч байна. 16 жил итгэсэн, харин одоо бол тэднийг тэтгэвэртээ суу, баяртай гэж хэлье. Бие дааж нэрээ дэвшүүлж байгаагийн учир бол ердөө л Алтай Алтайгаараа байх гэснийх. Өөрөө өөртөө эзэн байж ирсэн, тэр зарчим миний мөрдлөг. Монгол Улсыг цөлмөх биш, харин чин сэтгэлээсээ хөгжүүлэхийн төлөө зүтгэх хэнтэй ч, чөтгөр байсан ч хамтарч ажиллахад бэлэн" гэж товч тайлбарласан.

Сэтгүүлч З.Алтайг Монголын телевизүүдийн холбооны гишүүн байгууллагын удирдлагууд дэмжиж буйгаа илэрхийлэн хэвлэлийн бага хуралд оролцсон юм, ТV-9-ийн захирал Ц.Энхбат "Алтай бол хэн нэгэн биш, хийсэн ажилтай, туршлагатай, Монголын анхны чөлөөт телевизийг үүсгэн байгуулалцсан хүн, АИХ-ын төлөөлөгч ч байсан. Намтар, туршлага арвин, зөв үзэл бодолтой иргэн" гэлээ. Эднийх нэр дэвшигчийн сурталчилгааг үнэ төлбөр нэхэлгүй хийж өгнө гэдгээ ч хэллээ.

Р.Жаргал