Төрийн их цагаан сүлдийг Төв цэнгэлдэх хүрээлэн рүү залах ёслол эхэллээ. Үндэсний их баяр наадмын ёслолын оргил хэсгийн нэг энэ арга хэмжээг наадамчин олон догдлон хүлээж байна.

Цэнгэлдэх хүрээлэнгийн хойморт Төрийн гурван өндөрлөг суудлаа эзэллээ. Төв цэнгэлдэх хүрээлэнд наадамчин олон суудалдаа тухалж, Үндэсний их цэнгэл наадам эхэлж байна.







 

Тулгар төрийн 2224, Их Монгол Улсын 809, Ардын хувьсгалын 94 жилийн ой, Үндэсний их баяр наадмыг нээж Монгол Улсын Ерөнхийлөгч Цахиагийн Элбэгдорж үг хэллээ.

Төрийн тэргүүн наадмын нээлтийг үг хэлээд, Монгол төрийн онгон шүтээн Их цагаан сүлдэд мөргөж, хүндэтгэл үзүүллээ. Наадамчин олон энэ ёслолын хүндэтгэн гурвантаа хурайллаа.

Гавьяат жүжигчин,  дуурийн дуучин Г.Ариунбаатар, Э.Амартүвшин нар Төрийн их наадамд “Төрийн дуулал”-аа дуулав.

Үндэсний их баяр наадмын нээлтийн концерт эхэллээ.

 

Хүй долоон худагт хурдан азарга бариандаа орлоо. Энэ жилийн наадамд 193 азарга тоосоо өргөснөөс Архангай аймгийн Ихтамир сумын уугуул Ганзоригийн Тэмүүлэнгийн хээр азарга түрүүллээ.

Аман хүзүүнд Төв аймгийн Сэргэлэн сумын харьяат,  Тод манлай уяач, гавьяат малчин Дамбадаржаагийн Ононгийн бага хээр азарга хурдаллаа. Харин,

айргийн гуравт, Дамбадаржаагийн Ононгийн янзага зээрд,

айргийн дөрөвт, Хөвсгөл аймгийн Мөрөн сумын Болдбаатарын халиун азарга

айргийн тавд, Ховд аймгийн Загдсүрэнгийн Мэдсайханы хээр азарга тус тус орлоо.

Төв цэнгэлдэх хүрээлэнгийн гадаах талбайд 600 орчим худалдаа үйлчилгээний цэг ажиллаж байна.

Энэ жилийн наадмаар хуушуур 1000 төгрөг, айраг нэг аяга нь 1500, нэг литр нь 4000 төгрөгийн үнэтэй байгаа юм.

Мөн зарим асарт шорлог 10 мянган төгрөг, адууны чанасан мах 100 гр нь 2000 төгрөгийн үнэтэй худалдаалж байна.

Түүнчлэн ус ундаа, зайрмаг, хөөсөн чихэр зэрэг бүхий л төрлийн амттан зарж байна.

Баяр наадмын нээлтийн тоглолт өндөрлөж, хүчит бөхийн барилдааны нэгийн даваа эхлэхэд бэлэн боллоо.

Тулгар төрийн 2224 жил, Их Монгол Улс байгуулсны 809 жил, Ардын хувьсгалын 94 жилийн ой, Үндэсний  их баяр наадамд зодоглохоор улсын цолтон 86, аймаг цэргийн цолтон 205, сумын цолтой болон цолгүй залуу бөх 221, нийт 512 бөх бүртгүүлжээ.

Улсын алдар цолтой бөхчүүдээс дархан аварга Г.Өсөхбаяр, улсын аварга О.Балжинням, С.Мөнхбат, Г.Эрхэмбаяр нарын дөрвөн аварга зодоглоно.

Ерөнхийлөгч Ц.Элбэгдорж баяр наадмын сурын талбайд очиж, дуут сум тавьж, наадамчин олонд баяр хүргэлээ. Төрийн тэргүүн харваач хүүхдүүдэд гарын бэлгээ гардуулав.

Ерөнхий сайд Ч.Сайханбилэг гэргийн хамт сурын харваа үзэж байна.

Хүчит бөхийн барилдааны нэгийн даваа өндөрлөлөө.
 

Төв цэнгэлдэх хүрээлэн, Хүй долоон худаг орчим бага насны хүүхдэд тавих хараа хяналтыг сайжруулах, хүүхэд төөрсөн тохиолдолд Цагдаагийн байгууллагын 102 дугаарын утас буюу Төв цэнгэлдэх хүрээлэнд байрлах шуурхай мэдээллийн төвд яаралтай хандаж, мэдэгдэхийг Нийслэлийн цагдаагийн газраас зөвлөж байна.

Тулгар Төрийн 2224 жил, Их Монгол Улсын 809 жилийн ой, Үндэсний Их Баяр наадам, Ардын хувьсгалын 94 жилийн ойн баяр наадмын хурдан Их насны морьдун уралдаан эхлэх гэж байна.

Энэ жил  324 хурдан хүлэг төрийн наадамд тоосоо өргөнө. Морьд гарааны төхөөрөмжийн ард орсон байна.

24 километрийн зайнд уралдана.

Үндэсний их баяр наадмын хоёрын даваа эхэллээ. Хоёр даваанд Г.Өсөхбаяр Булганхангай дэвжээний залуу бөх Билэгжаргалаар, С.Мөнхбат аварга Увс нуур дэвжээний залуу бөх Тамираар хоёр давлаа. 
 

Их насны морьд нэгэн зэрэг гараанаас эргэлээ.

Энэ жил Улсын их хурлын гишүүд наадмын гоёлоо хэрхэн сонгосон бэ? Энэ талаар бэлтгэсэн фото мэдээг ЭНДЭЭС үзээрэй.

Их насны уралдаанд Архангай аймгийн Түгшрүүлэх сумын харьяат Эрчим хүчний дэд сайд Ө.Пүрэвбаатарын загал морь өнгөлж явна.

Улсын их баяр наадамд ойрын жилүүдэд зодоглоогүй байсан Монгол Улсын гарьд Б.Гантогтох өнөөдөр зүлэг ногоон дэвжээнээ барилдаж байна. Тэрбээр хоёрын даваанд Дундговь аймгийн Адаацаг сумын харьяат сумын заан Э.Ариунбуянаар давлаа. 
 

Хүй долоон худагт хурдан Их насны морьд бариандаа орлоо.

Энэ жилийн наадамд 324 морьд  тоосоо өргөснөөс Ховд аймгийн Мөст сумын харьяат Монгол улсын алдарт уяач С.Буяннэмэхийн хээр халзан морь түрүүлж,
Аман хүзүүнд зээрд морь
Айргийн гуравт Монгол улсын тод манлай уяач Д.Ганбаатарын шарга,
Айргийн дөрөвт Монгол улсын тод манлай уяач Л.Цэрэнчимэдийн ам цагаан халтар морь
Айргийн тавд саарал морь тус тус орлоо.

Говь-Алтай Баян-Уул сумын харьяат тод манлай уяач Д.Цэрэнжигмэд, дүү Д.Ганбаатар нарын хурдан буян их насны уралдаанд гурав, дөрөвт дараалан орж ирлээ. Д.Цэрэнжигмэд "Сэтгэл маш өндөр байна. Дүүгийн минь морь хамт айрагдлаа. Хязаалан наснаа эхэлж бид хоёрын хурдан хүлэг улс, бүсийн наадамд айргийн тавд дандаа хамтдаа давхиж байгаа хэмээн сэтгэгдлээ хуваалцлаа.

Сумын заан Д.Цэрэнтогтох Монгол Улсын гарьд М.Баяржавхланг хоёрын даваанд өвдөг  шороодууллаа. 

Үндэсний их баяр наадмын хоёрын даваанд Архангай аймгийн Тариат сумын харьяат аймгийн арслан Н.Адьяабат  Б.Гончигтавхайгаар даваагаа ахиуллаа.

Үндэсний их баяр наадмын бөхийн барилдааны хоёрын даваа дууслаа. Өнөөдрийн үйл ажиллагаа Урлагийн арга хэмжээгээр үргэлжилнэ.

Эзэн Чингисийн нэрэмжит талбайд 21:00 цагаас Улаанбаатарын үдэш "Эх орноо хамтдаа дуулья" урлагийн тоглолт болно.

Сайхан наадаарай.