Монгол Улсын Засгийн газрын үйл ажиллагааны хөтөлбөр болон “Хөдөлмөр эрхлэлтийг дэмжих жил”-ийн ажлын хүрээнд хүн амын эмзэг бүлгийн хөдөлмөр эрхлэлтийг дэмжих, ядуу өрхийн  амьжиргааг дээшлүүлэх туршилтын төслийг хэрэгжүүлэхээр  Нийгмийн хамгаалал, хөдөлмөрийн сайд Т.Ганди, Нийслэлийн Засаг дарга бөгөөд Улаанбаатар хотын захирагч Г.Мөнхбаяр нар өнөөдөр хамтран ажиллах санамж бичигт гарын үсэг зурлаа.

Энэхүү туршилтын төслийг НХХЯ-ны санаачилгаар хэрэгжүүлж байгаа бөгөөд төсөлд гэр оронгүй болон орцонд амьдарч буй зорилтот өрхийн гишүүдийг хөдөлмөр эрхлүүлж, амьжиргааг нь дээшлүүлэх, зан үйлийг өөрчлөх, амьдралд итгэх итгэлийг нь бэхжүүлэх, нийгмийн идэвхтэй гишүүн болгон хөгжүүлэх, амьдрах орчин нөхцлийг нь сайжруулах замаар нийгэмшүүлэх үйл ажиллагааны арга зүйн загварыг бий болгох, түүний туршлага, сургамжид тулгуурлан холбогдох хууль тогтоомжийг боловсронгуй болгох талаар хамтран ажиллах зорилготой юм.

Монгол Улсын төрөөс хүн амын хөгжлийн талаар баримтлах бодлогод тусгагдсан орон сууцны нөхцөл, хангамж, нөхцлийг сайжруулах зорилтын хүрээнд энэхүү төсөлд орон гэргүй болон орцонд амьдарч буй 120-оос доошгүй өрхийг хамруулах бөгөөд эхний ээлжинд нийслэлийн төвийн зургаан дүүрэгт хэрэгжинэ.

Төслийн хүрээнд дараахь арга хэмжээг авч хэрэгжүүлэх юм. Үүнд:
-Орон гэргүй болон орцны жижүүрээр ажиллаж, орцондоо амьдардаг өрхийн гишүүдийг хөдөлмөр эрхлэлтийн үйлчилгээнд хамруулах замаар ажилтай болгон, амьжиргааг дээшлүүлэх
-Засгийн газраас хэрэгжүүлж буй Их бүтээн байгуулалтын ажлын хүрээнд орцонд амьдардаг болон гэр оронгүй өрхүүдийг орон сууцжуулах зорилгоор хүний амьдрах орчин, ахуйн стандартад нийцсэн, төлбөрийн хувьд хямд төсөр халамжийн орон сууцны загварыг бий болгох.

-Төсөлд хамрагдагчдыг амьдралд итгэх итгэлтэй, зөв хандлага, зан үйлийг төлөвшүүлэх, нийгэмшүүлэхэд цогц үйлчилгээ үзүүлэх
-Эмзэг бүлгийн хүн амтай ажиллах, тэдэнд сэтгэл зүй болон бусад холбогдох чиглэлээр зөвлөгөө өгөх чиглэлээр хамтран ажиллах төрийн бус байгууллагыг сонгон авч хамтран ажиллах
-Сууц өмчлөгчдийн холбооны эрх зүйн байдал, нийтийн зориулалттай орон сууцны байшингийн дундын өмчлөлийн эд хөрөнгийн тухай, Орон сууцны тухай, Хүүхдийн эрхийг хамгаалах тухай зэрэг хууль тогтоомжуудад өөрчлөлт оруулах санал боловсруулах

-Олон нийтийн хандлагыг өөрчлөхөд чиглэсэн мэдээлэл, сурталчилгааны ажлуудыг зохион байгуулахаар төлөвлөж байна.

Түүнчлэн орон гэргүй болон орцонд амьдардаг өрх, орцны жижүүр, Улаанчулуутын хогийн цэг дээр амьдарч буй иргэд хамруулж, хороо, дүүргээр дамжуулан нийгэмшүүлэх ажлыг зохион байгуулж ажиллах болсон талаар НХХЯ-аас мэдээллээ.