Америкийн алдарт Time сэтгүүл Колорадо мужийн 15 настай Гитанжали Рао охиныг 2020 "Оны хүүхэд"-ээр нэрлэжээ. Учир нь Гитанжали Рао өсвөр насныханд тулгардаг бодит асуудлуудыг шийдэх шинжлэх ухааны инновацлаг санаанууд гаргаж чадсан байна.

Рао ундны уснаас хар тугалга илрүүлэх төхөөрөмж болон цахим орчны гадуурхалтай тэмцэх аппликейшн зохион бүтээжээ. 

Жүжигчин Анжелина Жоли Раогоос ярилцлага авахад эрдэмтэн гэхээр л зурагтаар үргэлж ахимаг насны эрэгтэй хүмүүс гарч байдаг болохоор охин өөрийгөө огтоос эрдэмтэн шиг харагддаггүй гэж ярьжээ. Тэрбээр цаашдын зорилгынхоо талаар "Дэлхий дахины өмнө тулгарч байгаа асуудлыг шийдэхийн тулд зөвхөн шинэ төхөөрөмж зохион  бүтээгээд зогсохгүй бусдад үүнийг хийх урам зориг өгөх нь миний гол үүрэг юм. Учир нь туршлагаасаа харахад чамтай адилхан хүн эргэн тойронд чинь байхгүй байх маш хэцүү юм билээ" гэжээ.

"Бидний үеийнхэн өмнө нь байгаагүй шинэ асуудлуудтай нүүр тулаад байна. Түүний зэрэгцээ хуучны олон асуудал ч шийдэгдээгүй хэвээр үлдсэн. Жишээ нь, бид дэлхийн цар тахлын шинэ эрин үед амьдарч байна. Түүний зэрэгцээ хүний эрхтэй холбоотой асуудлууд шийдэгдээгүй хэвээр байгааг та бүхэн мэднэ. Бас бидний бий болгоогүй ч өөрсдийн биеэр шийдэх ёстой цаг уурын өөрчлөлт болон цахим орчны гадуурхалт зэрэг асуудлууд ч байсаар байна" гэжээ.

Энэ мэтчилэн асуудлыг шийдэх чадвартай гэдгээ Рао нэг бус удаа харуулсан байна.

Форбс сэтгүүлээс гаргадаг 30 хүртэлх насны шилдэг залуусын өнгөрсөн оны жагсаалтад Гитанжали Рао охин багтжээ. Мөн 2017 онд долоодугаар ангид суралцаж байхдаа Рао нүүрстөрөгчийн нано утас ашиглан хар тугалга илрүүлдэг Tehys  төхөөрөмж зохион бүтээснийхээ төлөө Америкийн шилдэг залуу эрдэмтнээр нэрлэгдэж байв.

Түүнчлэн цахим орчин дахь гадуурхалтын шинж тэмдгийг хиймэл оюун ухаан ашиглан илрүүлдэг гар утасны аппликейшн зохион бүтээсэн байна. "Таныг үг бичих үед төхөөрөмж гадуурхлын өнгө аястай зүйл агуулж байгаа эсэхийг тодорхойлж, хэрвээ тийм бол бичвэрээ засах эсвэл өөрчлөхгүйгээр явуулах сонголт санал болгодог" хэмээн тэрбээр Time сэтгүүлд өгсөн ярилцлагадаа дурджээ. "Уг аппликейшний үүрэг нь бусад руу илгээх гэж буй үгсээ танд дахин нэг удаа бодох боломж олгодгоороо онцлогтой" хэмээн ярьсан байна.

Time  сэтгүүл анх 1927 онд "Оны эрэгтэй" номинац гаргаж, хожмоо "Оны хүн" болгон өөрчилж байжээ.  

Өнгөрсөн онд дэлхийн цаг уурын өөрчлөлттэй тэмцэгч швед охин Грета Тунберг тус сэтгүүлийн "Оны хүн"-ээр нэрлэгдсэн хамгийн залуу хүн болж байсан юм. Энэ жил анх удаа шинээр "Оны хүүхэд" номинацийг Nickelodeon хүүхдийн сувагтай хамтран гаргахаар болсон байна.

Уг номинацид "Оны хүүхэд"-ээр нэрлэгдэх эрхийн төлөө 8-16 насны 5000 гаруй хүүхэд өрсөлдсөн байна. Тэдгээрээс таван хүүхдийг сонгож, эцсийн дүнг хүүхдийн хороо гаргажээ. Төгсгөлийн шатанд үлдсэн хүүхдүүд  Nickelodeon сувгийг эзэмшдэг Viacom  компаниас мөнгөн урамшуулал авах гэнэ.

Сүүлийн үед залуучууд болон өсвөр насныхан өмнөө тулгараад буй асуудлуудыг шийдэхэд тус дэм болж буй өөрсдийн инновацлаг санааныхаа ачаар нийгэмд эерэг нөлөө үзүүлж байгааг гаргах нь "Оны хүүхэд" номинацийн зорилго гэдгийг тус сэтгүүл онцолжээ.

Долоо хоногийн дараа тус сэтгүүл "Оны хүн"-ээ нэрлэнэ.

Эх сурвалж: ВВС