УИХ-ын чуулганы нэгдсэн хуралдаан эхэллээ. Өчигдөр (2021.01.07) Шүүхийн тухай багц хуулийн төслийг бүтэн өдөр хэлэлцсэн юм. Өнөөдөр энэ төслийг үргэлжлүүлэн хэлэлцэнэ.    

Энэ хуулийн төсөлтэй холбоотой зарчмын зөрүүтэй 137 саналын талаар нь санал хураалт явуулсан. Өнөөдөр санал хураалт үргэлжилж байна.  Чуулганы хуралдаанд 67 гишүүн оролцож байна.  

Шүүхийн тухай хуулийн төслийн 18 дугаар зүйлд Ерөнхий шүүгчийн бүрэн эрхийг зааж, 18.1.1-т “Ерөнхий шүүгч шүүхийг дотоод, гадаад харилцаанд төлөөлөх”, 18.1.7-т “Хэргийн хөдөлгөөний ерөнхий удирдлага, хяналтыг хэрэгжүүлэх” эрх хэмжээтэй байхаар тусгажээ. Энэ бол бүх шатны шүүхийн ерөнхий шүүгчид олгосон эрх мэдэл юм.

Үүнээс гадна Дээд шүүх, Давж заалдах, Анхан шатны шүүхийн ерөнхий шүүгчийн эрх хэмжээ гээд тусдаа заалт бий. Хуулийн төслийн 27 дугаар зүйлд УДШ-ийн ерөнхий шүүгчийн эрх хэмжээг тусгахдаа 27.1.1-т “Танхимын тэргүүний ажлыг удирдах”, “27.1.4-т Улсын дээд шүүхийн тамгын газрын дарга, Шүүхийн судалгаа, сургалтын хүрээлэнгийн захирлыг томилох, чөлөөлөх” гэжээ.

УДШ-ийн танхимын тэргүүний бүрэн эрхийг төслийн 28 дугаар зүйлд зааж, 28.1.1-т танхимын тэргүүн “Танхимыг тэргүүлж, танхимын шүүгч, шүүгчийн туслах, нарийн бичгийн даргын ажлыг удирдан зохион байгуулах” гэжээ. Улсын дээд шүүхийн ерөнхий шүүгч Дээд шүүхийг бүрэн төлөөлж, түүний дор танхимын тэргүүн шүүгч нар ажиллах юм. Эдгээр заалтыг зарим гишүүн дэмжсэн ч зарим нь эсэргүүцсэн санал өглөө.    

УИХ-ын гишүүн, ажлын хэсгийн ахлагч Б.Энхбаяр:

-Улсын дээд шүүхийн шүүгч асан Ц.Зориг гэж хүн С.Зориг агсныг хөнөөсөн хэргийн шүүх хуралдааныг өөрөө удирдан, хэргийг шийдсэн. Ийм байж болох уу? Үүнийг таслан зогсооё гэхээр та нар эсэргүүцээд байх юм.  

-УИХ-ын гишүүн Х.Нямбаатар: Танхимын гишүүдээ томилж чадахгүй бол Ерөнхий шүүгч гэж хэн болох вэ? Улсын дээд шүүх танхимын зохион байгуулалтаар ажиллаад олон жил боллоо. Энэ заалт үндсэн хуулийн цэц дээр унах эрсдэлтэй.     

УИХ-ын гишүүн Ш.Адьшаа: УИХ-ын харьяаны Төрийн албаны зөвлөл гэж байгууллага бий. Ийм бэлэн байгууллага байсаар байтал яагаад Шүүхийн ерөнхий зөвлөл, Шүүхийн сахилгын хорооны зарим  гишүүнийг  УИХ-ын дарга  заирамж гарган, УИХ-ын нээлттэй сонсголоор сонгон томилох гээд байна вэ? Би үүнийг эсэргүүцэж байна. Энэ заалт Үндсэн хуулийн цэцэд очоод унана.          

Сахилгын  хороог хууль батлагдсанаас хойш 120 хоногийн дотор байгуулна. Шинээр байгуулах Шүүхийн ерөнхий зөвлөл, Сахилгын хорооны зардлыг Засгийн газар хариуцах болов.

Зарчмын зөрүүтэй саналаар санал хурааж дууслаа. Ингээд хуулийн төслийг эцсийн хэлэлцүүлэгт бэлтгүүлэхээр Хууль зүйн байнгын хороонд буцаав.