УИХ-ын гишүүн Н.Учрал Ерөнхий сайд У.Хүрэлсүхэд хандан Цахим мөнгө, блокчэйн технологийн талаар төрөөс баримтлах бодлого, цаашид цахим мөнгө, блокчэйн технологийн хөгжүүлэх болон хэрхэн дэмжиж, хамтран ажиллах, татварын болон хяналтын ямар тогтолцоог нэвтрүүлэх талаар асуулга тавьж, албан бичиг илгээжээ.

ЗГХЭГ-ын дарга Г.Занданштар асуулгын хариуг өнөөдөр албан бичгээр илгээсэн байна.
УИХ-ын гишүүний хүсэлтийн дагуу энэ асуудлыг санхүүгийн бүхий л харилцаанд оролцогчдын үйл ажиллагаанд хяналт тавих, зохицуулах чиг үүрэгтэй Санхүүгийн зохицуулах хороонд энэ асуудлаар хандсан боловч хариу өгөөгүйг ЗГХЭГ-ын дарга Г.Занданшатар албан бичгийнхээ эхэнд онцолжээ. 

Япон биткойныг албан ёсны төлбөрийн хэрэгслээр хуульчилсан анхны улс болоод байна.

Уг албан бичгийн хариуд “Санхүүгийн тогтолцоон дахь мэдээллийн технологийн хурдацтай хөгжил дэвшилтэй холбоотойгоор шинэ төрлийн бүтээгдэхүүн хэрэгсэл олноор бий болж байна. Биткойн болон блокчэйн технологид суурилсан бусад криптовалютууд үүний жишээ юм. Хэдий тийм ч одоогийн байдлаар Япон улс биткойныг албан ёсны төлбөрийн хэрэгслээр хуульчлаад байна.

Монгол Улсын хувьд төрийн мөнгөний бодлогыг хэрэгжүүлдэг Монголбанк биткойн болон блокчэйн технологийг хэрэгжүүлдэг криптовалютуудыг зохицуулдаг эрхзүйн тогтолцоо олон улсад ч хараахан боловсронгуй болоогүй тул криптовалютууд руу хөрөнгө оруулалт хийх нь эрсдэлтэй болохыг анхааруулсан.

Харилцаа холбоо, мэдээллийн технологийн газраас блокчэйнд тулгуурласан аливаа үйл ажиллагааг дэмжих нь зүйтэй гэж үзэн, уг технологийг нэвтрүүлэх боломжийн талаар нарийвчлан судалж байна”  хэмээн хариу албан бичигт дурдсан байна.