-21 настай өвөр монгол 18 настай монгол бүсгүйчүүд нийлж хил дамнуулан хүн худалдахыг завдлаа-

Б.Алтанзул зоволгүйгээр амархан мөнгөтэй болох арга хайж эхлэв. Бэлэн мөнгөтэй бол яаж өсгөх тухайгаа бодож болох сон. Харамсалтай нь ойр зуурын наймаа хийгээд арвижуулах мөнгө байсангүй. Гэ­нэт толгойд нь БНХАУ руу хүн худалдаалах бодол тө­рөв. Гэхдээ энэ ажлыг ган­цаараа яаж амжуулах вэ. Ингэхийн тулд БНХАУ-д та­нил­тай байх хэрэгтэй. Зүгээр ч нэг тани­лаар тогтохгүй найдвартай хүн байх ёстой. Бодоод бодоод найдвартай түнш болгочихоор хүн Б.Ал­тан­зулын санаанд орсонгүй. Харин ааваас нь хатаасан цагаан мөөг авдаг байсан өвөр монгол бүсгүйг санав. Тэр мөөг худалдаж авдаг хятад хүний орчуулаг­чаар гэрт нь хэд хэдэн удаа ирж байсан юм. Утас цохилоо. Тэд хамтарч бизнес хийх ажлын­хаа тухай амархан ойлголцож чадав. Ингээд бүс­гүй сонинд зар нийтлүүлэх ажилдаа шуурхайлан оржээ.

"Зар мэ­дээ", "Шуурхай зар" со­ни­нуу­дад "БНХАУ-ын агаа­рын зорчигч тээвэр компанид онгоцны үйлчлэгч хийх со­нир­холтой 20-24 насны охидыг яаралтай шалгаруулж авна. Өндөр цалинтай" хэмээ­жээ. Зар нийтлэгдсэн өдөр дөрвөн охин Б.Алтанзултай холбоо барив. Тэдний нэг нь түүнийг дагаж Замын-Үүд-Эрээний чиглэлийн галт тэр­гэнд суу­сан аж. Өвөр монгол бүсгүй Л.Цэцэгээ Эрээн хотод тэд­нийг тосох учиртай байв. Б.Алтанзул бүсгүйг хүн хил дамжуулан зарах гэж буйг мэдсэн Эрүүгийн цагдаагийн газрын төлөөлөгч Замын-Үүдэд саатуулж Л.Цэцэгээ рүү утас цохиулжээ. "Ба­раа­гаа" Эрээнд бус Замын-Үүдэд хүлээлгэж өгөх болсон тухай­гаа өвөр монгол бүсгүйд дуул­га­сан байна. Бүсгүй ч тэр даруй Замын-Үүдэд ирснээр эл хэрэг илчлэгдсэн аж. Хү­ний наймааны золиос болох гэж байсан хохирогч Б харин зугтжээ.

Л.Цэцэгээ, Б.Алтанзул нарыг хууль хяналтынхан Замын-Үүдээс "Ганц худаг"-ийн цагдан хорих төвд саатуулан Эрүүгийн хуулийн 113 дугаар зүйлийн гуравт зааснаар бус­дыг хил дамнуулан худал­да­хыг завдсан хэрэгт буруутган яллагдагчаар татаад буй юм.

Зарын дагуу ирсэн гурван охины хоёр нь гэрчээр мэ­дүүлэг өгсөн бол нэг нь Б-гийн адил энэ хэргийн хохирогч болоод байгаа аж. Учир нь тэр хэд хоногийн дараа Б-гийн араас БНХАУ руу явахаар зэхэж байжээ. Охид мэдүүлэг өгөхдөө " Б.Алтанзул БНХАУ-ын агаа­рын зорчигч тээвэр компанид онгоцны үйлчлэгч болох сонир­холтой охидыг шалгаруулж авна" хэмээн анхны уулзал­таараа хэлсэн байна. Гэтэл удаа ч үгүй "Чамайг онгоцны үйлчлэгчээр шалгаруулж ав­лаа" хэмээн зарын дагуу хандсан бүх охид руу буцаж утасджээ. Б.Алтан­зул " Би өмнө нь БНХАУ-д онгоцны үйлч­лэг­чийн ажил хийж байсан юм.

Монгол охи­дод өндөр ца­лин­тай сайхан амьдрах бо­ломж олгож байна" хэмээсэн гэнэ. Түүний хэл­сэнд охидын хоёр нь итгээгүй аж. Харин нөгөө хоёр нь итгэж нэг нь ийнхүү хүний най­мааны золиос болох шахжээ. Хэрэв Б-г авч явсан хэрэгт­нүүдийг хууль хяналтынхан цаг алдал­гүй бариагүй сэн бол түүний дараа явахаар зэхэж байсан Ц-гийн хувь заяа ч бүрхэг болох байсан нь дам­жиггүй. Дөнгөж 18 нас хүрч яваа Б.Алтанзул хялбархан аргаар мөнгө олохын тулд нутаг нэгт­нүүдээ, үе тэн­гийнхнээ худал­да­хаар завд­сан нь энэ. Хүн худалдаалах гэмт хэрэг үйлдэгчид залуу­жиж, арил­жааны хэлбэр рүү­гээ шилжиж буйг эндээс харж болно хэ­мээн хууль хянал­тын­хан тайлбарлаж байгаа юм.

Л.Цэцэгээ БНХАУ-ын ир­гэн бөгөөд 21 настай, Эрээн хотод амьдардаг аж. Б.Ал­тан­зул нь 18 настай, БНХАУ-ын ӨМӨЗО-ны Үндэсний их сур­гуульд сурч байгаад төлбөрөө төлөөгүйн улмаас эх орондоо буцаж ирсэн байна.

Зөвхөн он гарсаар улсын хэмжээнд 214 хүн алга бол­сон мэдээлэл бий. Тэдний 81 нь эмэгтэй. Өнөөдрийн байд­лаар тэдний есөөс бусад нь олдоод буй. Харин үлдсэн нь хаана байгааг хэн ч мэдэхгүй. Алга болсон бүсгүйчүүд 15-36 насныхан. Нэг нь хүү­хэд гэнэ. Дээрх хүмүүс хүний наймаа­ны золиос, цаашлаад эд эрхт­ний наймаачдын гарт өртсөн байхыг ч үгүйсгэх аргагүй юм.

Монголд янхны сүлжээ илүү зохион байгуулалтад орж, үүнийг дагаад хүний най­мааны хэрэгт өртөгсдийн тоо нэмэгдэж буйг хууль хянал­тынхан анхааралдаа авахгүй бол болохоо байжээ. Бие үнэ­лэгчдээр ашиг олдог, тэднээс татвар авч амьд­ра­лаа зал­гуулж буй олон хүн Монголд байна. Цагдаа­гийн­хан лав ийм маягаар амь­дардаг биеэ үнэ­лэгчдийг да­рам­талдаг, биеийг нь үнэ­лүүл­дэг 11 бүлгийн зохион байгуу­лагчдыг илрүү­лээд буй.

Тухайлбал, Баянзүрх дүүр­гийн нутагт байрлах Бө­хийн өргөөний автобусны буудал, Сүхбаатар дүүрэгт орших "Улаанбаатар" зочид буудлын өмнө эмэгтэй­чүү­дийг худалд­даг бүлэг бий. Тэднийг Оюу­наа, "Балиус" хочтой Уянга, Чогдон, "Бар­заак" Туяа "Онон" хочит Ж.Мөнх­жаргал, "Бү­дүүн" Бул­гантамир нарын хүмүүсийг илрүүлсэн юм. "Онон" хочит Ж.Мөнх­жаргал, "Бүдүүн" Бул­ган­тамир нар Бөхийн өргөө орчмын биеэ үнэлэгчдийн толгой­лог­чид гэнэ. Тэд нэг биеэ үнэ­лэгчээс өдөрт 15 мянган төг­рөгийн татвар ав­даг аж. Тэд­ний харьяанд 20 гаруй эмэгтэй байдаг бөгөөд" Онон", "Бү­дүүн" хочит тол­гой­логч нарыг нь бусдын биеийг ху­далд­сан хэрэгт буруутган цагдаа­гийн­хан эрүү­гийн хэрэг үүсгэн шалгаж хэргийг Сүх­баатар дүүргийн шүүхэд шил­жүүлээд буй юм. Саун мас­сажны газарт охи­дын, эмэг­тэйчүүдийн биеийг үнэлүүлэх ажил зохион бай­гуулдаг П.Да­ваажавыг ч мөн хууль хянал­тынхан илрүүлэн шалгаад байна. Тэрбээр саун мас­сажны найман газар тү­рээс­лэн ажиллуулж, охидын биеийг үнэлүүлэн бизнес эрхэлдэг болох нь тогтоогд­сон юм. Мөн "Сонжин гранд"-д Н.Алтансувд, "Кореана" зочид буудалд БНСУ-ын ир­гэн Кан Ю Сик, "Сөүл" зочид бууд­лын сауныг түрээслэгч Г.Жан­лав­цогзол нар нь охи­дын биеийг үнэлүүлдэг байс­ныг цагдаагийнхан илрүүл­сэн. Мөн Дорнод, Дорно­говь, Дархан-Уул, Орхон аймгийн цагдаа­гийнхан биеэ үнэлэгч 95 бүс­гүйг илрүүлэн хоёр зочид буудлын үйл ажиллагааг зог­соохоор хол­богдох албан бай­гуул­ла­гуу­дад хандсан байна. Харин Дорнод аймгийн цагдаа­гийн­хан нийт 113 биеэ үнэлэгчийг илрүүлэн тэдний 85 нь БНХАУ-д очиж биеэ үнэлдэг болохыг тогтоосон байна.

Охид, эмэгтэйчүүдийг хуурч мэхлэх, дарамтлах замаар биеийг нь хүчээр үнэлүүлж байсан Ч.Саран­гэрэл, Английн иргэн Ж.Сильво нарт шүүхээс ар­ван жил хорих ял ногдуулсан байх юм. Хүн худалдах гэмт хэр­гийг шийдвэрлэсэн байд­лыг Нийслэлийн прокурорын газ­рынхан саяхан судалжээ.

Энэ оны эхний есөн са­рын байдлаар улсын хэм­жээнд 15421 гэмт хэрэг бүрт­гэгд­сэнээс найм нь хүн ху­дал­даалах хэрэг байсан байна.

Цагдаагийн байгууллага 2007-2008 онд 13 хэргийг мөрдөн байцааснаас дөрвийг нь хэрэгсэхгүй болгож, нэгийг нь түдгэлзүүлж, зургаан хэр­гийг шүүхэд шилжүүлжээ. Одоогоор хоёр хэрэг мөрдөн байцаалтын шатанд шалгаг­даж байна. Прокурор зургаан хэ­рэгт яллах дүгнэлт үйлдэж шүүхэд шилжүүлсэн аж. Ха­рин үүний нэгийг нь шүүх Эрүү­гийн хуулийн 113 дугаар зүй­лийн гурав дахь хэсэг буюу хүн худалдаалах гэмт хэрэг гэж үзэж, тавыг нь уг хуулийн 124.2 буюу бусдыг биеэ үнэ­лэхэд зуучилсан гэж үзэн ялласан байна. Гэмт хэргийн гэрч, хохирогчийг хамгаа­лалтад авах, аюулгүй байдлыг нь хангах эрх зүйн зохи­цуулалт хангалтгүй байгаа­гаас хохи­рогч, гэрчүүд өмнөх мэдүүл­гээсээ буцах, Макао, Син­гапур зэрэг зарим улс оронтой эрүүгийн хэргийн талаар эрх зүйн туслалцаа харилцан үзүүлэх гэрээ хэ­лэлцээр байх­гүйгээс эрүү­гийн байцаан шийтгэх үйл ажилла­гаа му­хар­далд орох, xохирог­чид нь биеэ үнэлсэн гэх асуу­далд орооцолдохоос эмээх зэрэг сөрөг хандлага гарч байна гэж прокурорууд дүгнэ­сэн байна. Өнөөдөр хүний наймаа тойр­сон хэрэг тас­ралт­гүй гарч байна. Дээрх хэргүүд бол бидэнд зөвхөн мэдэгдээд байгаа нь. Харин хууль хянал­тынхны хараанд өртөөгүй хэдэн хэрэг гарч, хичнээн эмэгтэй хүний най­мааны золиос болж буйг бид мэдэх­гүй.

Г.Дэлгэрцэцэг