Төрийн байгууллагаас үзүүлж буй төрөл бүрийн үйлчилгээг нэг дор төвлөрүүлэн, иргэд, аж ахуйн нэгж, байгууллагаас тавьсан хүсэлтийг “Нэг цэг”-т хүлээн авч шийдвэрлүүлэн “нэг гарц”-аар гаргах үйлчилгээний шинэ арга бол Нэг цэгийн үйлчилгээ юм.

Энэ үйлчилгээ нь хүнд сурталтай хэмээх нэр зүүх болсон төрийн үйлчилгээг цаг хугацаа, хөрөнгө мөнгөний хэмнэлттэйгээр гүйцэтгээд зогсохгүй, чирэгдэлгүй, хяналттай болгож, үйлчилгээг үзүүлж буй болон авч буй талуудын сэтгэлд нийцсэн, хүртээмжтэй болох давуу талтай юм.

Энэ үйлчилгээг 2006 оноос эхлэн хэрэгжүүлж эхэлсэн бөгөөд эхний ээлжинд Сүхбаатар дүүрэгт хэрэгжүүлж эхлээд байгаа ажээ. Нийгмийн даатгал, нийгмийн халамж, үйлдвэрлэл үйлчилгээ, нотариат, банк зэрэг үйлчилгээг нэг цэгт төвлөрүүлсэн нь иргэдийн сэтгэлд тун их нийцээд байгаа гэнэ. Тиймээс Төв аймгийн Зуун мод хотод 2008 оны 4 дүгээр сарын 29-нд нэг цэгийн үйлчилгээг жишиг байдлаар нээн ажиллуулж Сэлэнгэ, Хэнтий аймагт мөн нэвтрүүлэхээр зохион байгуулж байна.

Цаашид 2010 оны есдүгээр сарын 30-ныг хүртэл хугацаанд Нийслэлийн бүх дүүрэг, аймгийн төвүүд болон хангайн бүсийн төв Хархорин хотод өөрөөр хэлбэл үндэсний хэмжээнд зохион байгуулах юм.

Энэ асуудлыг шийдвэрлэхээр Монгол Улсын Үйлдвэр, худалдааны яам Швейцарийн хөгжил, хамтын ажиллагааны Агентлаг Монгол Улсад “Нэг цэгийн үйлчилгээ” төсөл хэрэгжүүлэх хэлэлцээрт гарын үсэг зурах ёслолын арга хэмжээ маргааш буюу зургадугаар сарын 3-ны өдрийн 9.30 цагт Үйлдвэр, худалдааны яамны хурлын танхимд болох ажээ. Хэлэлцээрт Монгол Улсын Засгийн газрын гишүүн, Үйлдвэр, худалдааны сайд Х.Наранхүү, Швейцарийн хөгжил, хамтын ажиллагааны Агентлагийн Зүүн Өмнөд Азийн асуудал эрхэлсэн хэлтсийн дарга Вольтер Мэйр нар гарын үсэг зурна.

М.Жаргал