Ерөнхий сайд Л.Оюун-Эрдэнийг орлогоо нотлох, нотлоогүй тохиолдолд огцрохыг шаардсан  “Огцрох амархан” нэртэй жагсаал 13 дахь өдрөө үргэлжилж байна. 

Жагсаал Австрийн Ерөнхийлөгчийн айлчлалтай холбогдуулан Ялалтын талбайд буюу Тэнгис кино театрын зүүн талын “Эрх чөлөөний талбай”-д үргэлж буй юм. Жагсаалын зохион байгуулагчид хэвлэл мэдээллийн байгууллагуудад нээлттэй ярилцлага өгөхөөр өнөөдөр 18:00 цагт тов зарласан.

Хамгийн эхний шаардлагаа бүгдээрээ саная. Орлогоо л нотол шүү дээ.

Жагсагч Ж.Өнөмөнх “Жагсаал эхлээд 13 өдөр өнгөрчээ. Яаж эхэлснийг бүгд мэдэж байгаа. Улс орон бүр татварын системтэй. Хүн бүр татвараа төлөөд түүндээ тохирсон нийгмийн үйлчилгээг төрөөс авдаг. Сүүлийн жилүүдэд бид угаасаа л уур, бухимдалтай байсан. Гэтэл Ерөнхий сайдын гэр бүлийн орлогоосоо давсан хэрэглээ нь залуусыг уурлаж, бухимдахгүй байхын аргагүйд хүрсэн. Тиймээс найзуудаараа нэгдэн санаачилга гарган эхэлсэн жагсаал 13 дахь өдрөө үргэлжилж байна.

Өнгөрсөн өдрүүдэд үйл ажиллагаанууд давхацлаа, сөрөг жагсаал боллоо. Хамгийн эхний шаардлагаа бүгдээрээ саная. Орлогоо л нотол шүү дээ. Орлогоо нотлохоос бусад бүх зүйлийг хийчихлээ, засаг, төр намын асуудал яригдаж байна. Зүгээр л орлогоо нотлох асуудлыг ингэж хүндрүүлсэн. Бид ардчилсан улс, тиймээс иргэд шаардлага тавьж байгаа бол засаглалын тэргүүн гарч ирээд хариу өгөх үүрэгтэй. Гэтэл 13 хоногт Ерөнхий сайд, МАН-ын бага хурлаас, ер нь төрөөс ямар хариу өгөв?.

Олон нийтийн мэдэх эрхийг хангахгүй байгаа энэ байдал нь Л.Оюун-Эрдэнийг Ерөнхий сайд байх чадамжгүйг нь илэрхийлж байна. Өнөөдөр Сүхбаатарын талбайд болж буй жагсаал нь УИХ-ын гишүүд рүү чиглэсэн. Намайг дэмжсэн санал өгөхгүй бол ийм хувь тавилан та нарыг хүлээж байгаа шүү гэдгийг харуулж байгаа юм.

Иргэд төрийг эсэргүүцээд жагсах чинь асар гунигтай үйл явдал шүү дээ. Гэтэл иргэдийгээ сонсохгүй 13 хонож буйг нь бодохоор үнэхээр гомдмоор" гэв.