“Хүний эрхийн үндэсний комиссын гишүүд нэгнээ тагнаж чагнаж, гүйцэтгэх ажиллагаа явуулсан хэрэг Захиргааны хэргийн шүүхэд шилжсэн. УИХ-ын дарга энэ асуудлыг анхааралдаа авна уу” гэх мэдээ цахим орчин таржээ. Энэ талаар ХЭҮК-иос тодруулахад, ХЭҮК-ын хоёр ажилтны дунд үл ойлголцол гарч, нэг нь “Ажлын байрны дарамт үүсгэсэн” гэж Ёс зүйн дэд хороондоо гомдол гаргасан.

Дэд хороо уг асуудалтай танилцаад, “Ажлын байрны дарамт үзүүлсэн“ гэх дүгнэлт гаргаж, Буруутай ажилтныг нэгнээсээ уучлалт гуйхыг хүссэн байна. Гэвч “Уучлалт гуйхгүй” гэж, Захиргааны хэргийн шүүхэд гомдол гаргажээ.

Шүүхээс уг гомдлыг хянаж үзээд,  Ажлын байрны дарамт үүсгэсэн гэж үзэх үндэслэлтэй” гэсэн шийдвэр гаргажээ.
ХЭҮК-ын ижил түвшний хоёр ажилтны дунд гарсан ийм маргааныг “нэгнээ тагнаж, чагнасан, гүйцэтгэх ажиллагаа явуулсан” гэх мэдээлэл нь үндэслэлгүй, ташаа мэдээлэл гэж тус комиссын хэвлэлийн төлөөлөгч хариулав.

ХЭҮК-иос энэ асуудлаар өнөөдөр 14.00 цагт мэдээлэл хийнэ. 

ХЭҮК-ын Тамгын газрын дарга Ц.Адъяахишиг хоёр ажилтны хөдөлмөрийн харилцаанд үүссэн маргаантай холбоотой асуудлаар мэдээлэл хийж байна.

Ц.Адъяахишиг, Тамгын газрын хоёр албан хаагчийн хооронд маргаан үүссэн. Ажил олгогч, албан хаагчид хөдөлмөрийн харилцаанд орохдоо бие биенээ үл хүндэтгэх, ажлын байранд дарамт учруулахыг Хөдөлмөрийн хууль болон Төрийн албаны тухай хуулиар хориглодог.

Энэ төрлийн хэрэг маргаан үүссэн тохиолдолд хуулиар хамгаалсан эрхийнхээ хүрээнд байгууллагынхаа удирдах ажилтан, холбогдох Ёс зүйн хороо, зөвлөл, Хөдөлмөрийн маргаан таслах зөвлөл, ХЭҮК, шүүхэд хандах эрхтэй.