Иргэн У-ийн эхнэр 2024 оны 07 дугаар сарын 24-ний өдөр нас барсан. Иймд иргэн У эхнэрийнхээ авч байсан өндөр насны тэтгэврийн нэмэгдлийн 20 хувийг авах (359,501 төгрөг) өргөдөл гаргажээ.

Баянгол дүүргийн Нийгмийн даатгалын хэлтэс иргэн У-д 2024 оны 10 дугаар сарын 28-ны өдөр өндөр насны тэтгэврээ тогтоолгох эрх үүссэн. Иймд тухайн гэр бүлийн хоёр гишүүн хоёулаа нийгмийн даатгалын сангаас өндөр насны тэтгэвэр тогтоолгосон байх ёстой гэдэг шаардлагыг хангахгүй байна хэмээн татгалзсан хариу өгчээ. Үүнийг үл зөвшөөрч иргэн У шүүхэд нэхэмжлэх гаргасан байна.

Татгалзлыг тодруулбал, Нийгмийн даатгалын сангаас олгох тэтгэврийн тухай хуулийн 9 дүгээр зүйлийн 9.1, 9.2-т өндөр насны тэтгэвэр авч байсан тэтгэвэр авагч нас барсан тохиолдолд түүний нөхөр, эсхүл эхнэрийн өндөр насны тэтгэврийг нэмэгдүүлнэ. Тэтгэврийн нэмэгдлийг тэтгэвэр авагчийн нас барсны дараагийн хоёр дахь сараас эхлэн олгоно гэж заажээ.

Хуулиас үзвэл, тухайн гэр бүлийн хоёр гишүүн хоёулаа өндөр насны тэтгэврээ тогтоолгон, Нийгмийн даатгалын сангаас өндөр насны тэтгэвэр авдаг нөхцөл шаардлагыг хангасан байх ёстой юм байна.

Харин иргэн У-ын хувьд өөрийн эхнэрийг нас барснаас хойш 3 сарын дараа өндөр насны тэтгэврээ тогтоолгосон буюу өөрийн /нас барсан/ эхнэрийн хамт хоёул өндөр насны тэтгэвэр авч байгаагүй болох нь баримтаар тогтоогдсон байна. Тиймээс шүүхээс Баянгол дүүргийн Нийгмийн даатгалын газраас иргэн У-ын тэтгэвэр нэмэгдүүлэх хүсэлтийг шийдвэрлэхгүй байгаа үйл ажиллагааг хууль бус гэж буруутгах боломжгүй гэж нэхэмжлэхийг хэрэгсэхгүй болгожээ.