СХД-ийн 20 дугаар хорооны нутаг дэвсгэр 22-ийн товчоо явах замд “Зам хашаад байна” гэх цахим сүлжээнд энэ сарын 28-нд нийтэлсэн  мэдээллийн дагуу Цагдаагийн байгууллагаас шалгалт явуулжээ. Шалгалтаар  Shaanxi-x3000 маркийн том оврын ачааны автомашины жолооч дараах зөрчлүүд гаргасан нь тогтоогджээ.

Тодруулбал,

• Нийслэлийн гудамж замын хөдөлгөөнд оролцох маршрутын зөвшөөрөлгүй;
• Монгол Улсын Замын хөдөлгөөний дүрэмд заасан Замын хөдөлгөөнд оролцогч нь аюул, хохирол учруулахгүй, хөдөлгөөнд осолтой байдал бий болгохгүйгээр зорчино. гэсэн заалтыг зөрчиж бусдын хөдөлгөөнийг саатуулсан;
• Ачааны автомашин, автобусны ар талд түүний овор хэмжээг тодотгох, үзэгдэлтийг сайжруулах зорилгоор гэрэл ойлгох шинж чанар бүхий туузан наалт, эсхүл улаан өнгийн гэрэл ойлгуурыг нэмж байрлуулсан байвал зохино зэрэг заалтыг тус тус зөрчсөн үндэслэл тогтоогдсон байна.

Дээрх зөрчилд Зөрчлийн хуулийн 14.7.33 дэх хэсэгт зааснаар 10 мянган төгрөгөөр, 14.5.17 дах хэсэгт зааснаар 150 мянган төгрөгөөр зөрчил тус бүрд шийтгэл оногдуулж хариуцлага тооцжээ. Хөдөлгөөнд оролцогч та бүхэн бусдад аюул, хохирол учруулахгүй, хөдөлгөөнд осолтой байдал бий болгохгүйгээр зорчихыг Тээврийн цагдаагийн албанаас анхаарууллаа.

Эх сурвалж: ТЦА