Нүүрсний хулгайтай тэмцэх жагсаал хоёр дахь өдрөө үргэлжилж байна. Өнөөдрийн жагсаалын үеэр жагсагчид Төв шуудангийн уулзварыг хаасан бол зарим нь Төрийн ордон руу дайрах оролдлогыг хийжээ. Улмаар хамгаалалтынхан дайрсан иргэдийг гаргасан бөгөөд мөн л бухимдсан иргэд Төв талбайд зассан гацуурыг шатаасан гэх мэдээллийг өгөөд байна.

Жагсагчид Төрийн ордон руу орох оролдлого хийсэнтэй холбоотойгоор хамгаалалтыг нэмэгдүүлжээ.

Зарим жагсагч одоо ч Төрийн ордон руу орохоор оролдож,  Чингис хааны хөшөө рүү авирчээ. Жагсагчдын зарим нь  жагсаалаа тараахыг бусдадаа уриалж байгаа бол нөгөө хэсэг нь ордон руу хүч хэрэглэн, нэвтрэхийг уриалсаар байна.  Цагдаа нар Төрийн ордон руу орох хаалгыг хамгаалж байгаа бөгөөд иргэдийн эсэргүүцэл нэмэгдсээр байна.

Эмх замбараагүй байдал улам нэмэгдэж буй бөгөөд насанд хүрээгүй хүүхдүүд Төв талбайд олноор цуглаад байгаа тул эцэг эхчүүд хүүхдүүдээ гэртээ байгаа эсэхийг нягтлах шаардлага үүсээд байна.

Төрийн ордны урд талын хаалга буюу Их Эзэн Чингис хааны хөшөөтэй хэсгийн хаалга руу жагсагчид дайрч, цагдаагийн алба хаагчид болон иргэдийн дунд мөргөлдөөн үүсэх нөхцөл үүсээд байна. Төрийн ордны урд талын хаалга орчмын шилэн пасаднууд хагарч, Төрийн ордны баруун хаалга хэсэгт ч орох гэсэн иргэд ихээр нэмэгдлээ.

Нүүрсний хулгайтай тэмцэхээр эхэлсэн жагсаал өнөөдрийн эдийн засгийн хүндрэл, үнийн өсөлт, авлигатай тэмцэн ийнхүү улам нэмэгдсээр байгаа юм. Жагсагчдын зүгээс Ерөнхий сайд, Ерөнхийлөгчтэй уулзах хүсэлтийг тавиад буй бөгөөд Ерөнхий сайдын ахлах зөвлөх А.Ариунзаяа шаардлагыг хүлээн авсан. ЗГХЭГ-ын дарга Д.Амарбаясгалан жагсагчидтай уулзана гэсэн хэдий ч одоог хүртэл гарч ирээгүй байна.