Dota 2-ын 2023 оны эхний том тэмцээн "Лима мажор" перу улсад өндөрлөлөө. 500 мянган ам.долларын шагналын сантай тэмцээний финалд баруун Европын хоёр баг тунаж Gaimin Gladiators аваргын цомыг хүртэв.

Тэмцээн эхэлснээс хойш өнгөтэй байсан гладиаторууд Play-off-т нэг ч тоглолтод хожигдолгүй илт давуу түрүүлэв. Тэд Хятадын Team Aster, баруун Европын Entity, шинээр сэргэж хүчирхэгжсэн Team Liquid багуудыг ээлж дараалан илүүрхэж дээд хүснэгтийн финал болоод Гранд финалыг оролцуулан Team Liquid багийг 5 удаа хожиж гайхуулсан.

Оросын dyrachyo, АНУ-ын Quinn, Данийн Ace, Германы tOfu, Нидерландын Seleri нараас бүрдэх олон улсын баг ингэснээр DPC лигийн 400 оноо цуглуулж 200 мянган ам.долларыг халааслав.

Өмнөд Америк тивд анх удаа болсон ч үзэгч багатай, хүлээлтэд хүрээгүй зэрэг шалтгаанаар цөөнгүй шүүмжлэл дагуулсан мажорын хамгийн онцлох баг нь Зүүн Өмнөд Азийн Talon Esports байв. Доод хүснэгтийн финал хүртэл явахдаа Shopify Rebellion, Entity, Team Spirit гээд чансаа дээгүүр багуудаа хожсон тэднийг ийм амжилт үзүүлнэ гэж таамагласан нь цөөхөн.