Өмнөговь аймгийн есөн гайхамшгийн нэг Ёлын ам нь Говь Гурвансайхан уулсын Зүүнсайхан ууланд оршдог. Говийн экосистемийг хамгаалахын тулд тус байгалийн үзэсгэлэнт газрыг 1965 онд "Дархан цаазат газар" болгосон байна.

1990-ээд оны эхэн үеэс тусгай хамгаалалттай газар нутгийн сүлжээ бий болсон. Улмаар говийн экосистемийн унаган төрх, тэнцвэрт байдлыг хадгалах, байгаль, түүх, соёлын өвийг хамгаалах, танин мэдэх, зохистой ашиглах, бүс нутгийн тогтвортой хөгжлийг хангах зорилгоор УИХ-ын 1993 оны 83-р тогтоолоор Говь гурвансайханы байгалийн цогцолборт газарт оруулж хамгаалсан.

Байгалийн үзэсгэлэн бүрдсэн энэ газар нь өвөрмөц хадаар хүрээлүүлсэн, зундаа горхи урсаж, өвөлдөө булаг нь хөлдөн зузаан мөсөн давхарга үүсдэг.

Долоодугаар сарын дунд хүртэл мөсөн бүрхүүл тогтцоо хадгалдаг Ёлын ам нь гадаад, дотоод аялагчдын гол зорин очих газруудын нэг юм.

Ёлын амны мөс нь зогсоолоос цааш талдаа 2 км бөгөөд аялагч та явган аялахаас гадна нутгийн хөтчийн морь болон хөсөг тэргээр аялах боломжтой.

Ёлын ам орчимд

• Цоохор ирвэс (Snow leopard - Uncia uncia)
• Янгир (Ibex - Capra ibex sibrica)
• Аргаль (Wild Sheep - Ovis ammon)
• Саарал чоно (Grey wolf - Canis lipus)
• Хэрмийн бялзуухай (Wall creeper - tichodroma muraria)
• Идлэг шонхор (Saker falcon - Falco cherrug)
• Цармын бүргэд (Golden eagle - Aguila chrysaetos)
• Ооч ёл (Lammergier - Gypaetus barbatus)
• Алтайн хойлог (Altais snowcock - Tetraogallus altaicus)
• Хималайн хажир (Himalayan vulture - Gyps himalayensis)
• Гозоорой зурам (Alashan ground squirrel - Spermophilus alashnisus buchner)
• Бозлог зурам (Red cheeked ground squirrel - Spermophilus erythro genus brandt)
• Монгол огдой (Pallas pika - ochotona pallasi gray) зэрэг амьтад элбэг.