Долдугаар сарын 1-ний үймээн самууны үеэр амиа алдсан таван залуу, шархадсан иргэдийн ар гэрийнхэн энэ сарын 11-нээс эхлэн Прокурорын дэргэдэх Мөрдөн байцаах газарт шалгагдаж хавтаст хэрэгтэйгээ танилцаж эхэлсэн. Одоогоор эхний гурван хохирогчийн ар гэрийнхнийг хавтаст хэрэгтэй нь танилцуулсан гэнэ. Нийт 23 хэрэг байгаа аж. Харин амь насаа алдсан иргэдийн ар гэрийнхэн тэмцлийн хурц хэлбэр болох өлсгөлөн зарлаад хагас сарын нүүрийг үзсэн. Тэдний ихэнхийн биеийн байдал муудаж, эмнэлэгт хэвтэн эмчлүүлж байгаа. Харин буудуулж нас барсан Э.Доржсүрэнгийн аав Ц.Энхбаяр ганцаар өлсгөлөнгөө үргэлжлүүлж байна.

Түүнтэй биеийнх нь байдал ямар байгаа болон хавтаст хэрэгтэйгээ танилцсан эсэхийг тодруулхад "Биеийн байдал одоогоор сайн байгаа. Өдөр бүр эмч ирж үздэг. Харин биеийн арьс хуурайшаад байгаа. Одоогоор хавтаст хэрэгтэйгээ танилцаагүй. Удахгүй танилцах байх" гэлээ.

Э.Хүрэлбаатар