Загварын ертөнцийн өнгө төрхийг тодорхойлогч наадмуудын "Хаан" нь гэгддэг “Гоёл" хаяанд ирлээ. Жил бүрийн 12 сарын эхээр зохиогдож, шинэ жилийн үдшүүдээр телевизүүдийн ганц чимэг нь болдог тус наадам энэ жил гахайн ханиаднаас болж мөн л хойшлогдоход хүрээд байгаа аж.

Өөрөөр хэлбэл 12 сарын эхээр бус дунд үе буюу 17-19-ний хооронд зохиогдох бололтой. Энэ жилийн хувьд "Гоёл 2010" наадмын ерөнхий ивээн тэтгэгчээр Юнайтед Фүүдс корпораци оролцох бөгөөд "Морьтой Чингис" брэндийн нүүр царай болох моделийг тодруулж жилийн гэрээ байгуулах гэнэ. Мөн жил ирэх тусам хүрээгээ тэлж буй Гоёл наадамд олон орноос ирж оролцох хүсэлтээ гаргаад байгаа аж.

Хүнийг нас, зүс, бие галбираар нь өөлөн хүссэн ч эс хүссэн ч замын голд хаяж чаддаг загварын ертөнцийг хамгийн харгис салбар ч гэж нэрлэх нь бий. Анх "ТОП МОДЕЛЬ" гэх цолыг олгож эхэлснээс хойш өдгөө 10 загвар өмсөгч энэ хүндтэй алдрыг хүртээд байгаа. Амжилт, алдар хүнд араасаа гэрэл сүүдрийг хослуулан дагуулж байдаг жамаар тэд ч элдвийн хэл аманд өртсөөр ирсэн.

Гэхдээ тэдний хэн нь хэн бэ. Ямар ч байсан тэд өнөөдөр жижгэвтэр нүүр, урт хөл, туранхай биетэй л бол загвар өмсөгч гэж өөрийгөө бодон сээхэлзэх олон охидоос яалт ч үгүй ялгарч, топ нэр шигээ тод гялалзан Монголын оддын тоонд зүй ёсоор орж чадсан. Энэ бол топуудын топ байж чадаж байгаагийн нэгэн илрэл. Олныг нуршилгүй эрхэм танд өршөөлгүй энэ салбараас тодорсон 10 топын хэн нь хэн бэ гэдгийг хүргэе.

Ариунаа ясны модель
Монголчууд оногдсон ажлаа хэнд ч гологдохооргүй бас хэнээс ч илүү хийж чаддаг нэгнээ "Ясны" гэж энэ таагүй ч гэмээр үгээр магтан тодорхойлдог. Загварын ертөнцийнхөн Ариунааг ийн "ясны модедь" гэж үнэлдэг. МДХ хэдий тухайн үед "Toп модель" бус шилдгийн шилдэг загвар өмсөгч цолыг олгож байсан ч түүнийг топ моделийн эгнээнд багтаадаг. Түүнээс хойшх загвар өмсөгчдийг харин топ хэмээн цоллодог болсон билээ. МУИС-ийн ОУХДС-д сурч байхдаа тэрээр жинхэнэ мандан бадарч оргил үедээ явсан нэгэн.

Гэсэн ч тухайн үедээ архины бизнес эрхэлдэг гэгддэг байсан Сэргэлэнтэй тоонот гэрт толгой, тостой шөлөнд хошуу холбосноор загварын ертөнцийг дэндүү эрт "хаясан" нэгэн. Өдгөө тэрээр Монголын үрсийг маш олон болгох үйлсэд хүчин зүтгэж, хүүхдүүдээ асран сайн ээж болсон байгаа. Гэсэн ч хаа нэгтээ тааралдахад урьдын сайхан төрхөө хадгалсаар яваа нь илт мэдрэгддэг. Өршөөлгүй салбарыг өөрийн хүслээр эрт орхисонд нь загварынхан одоо ч харамсаж явдаг юм билээ. Гэхдээ түүний сонголт зөв ч байсан биз. Учир нь загварын ертөнц гэдэг харгис салбар учраас тэр.

Э.Одгэрэл хамгийн эмэгтэйлэг топ
Анхны топ модель цолтон. Түүнийг өдгөө ч хүмүүс мөнхийн залуу Одгэрэл хэмээн нэрийдсээр байгаа. Өөрөө ч "миний мөнхийн залуу байдгийн нууц..." хэмээн реклам сурталчилгаанд тоглон, түүнийгээ батлахыг хүсэх мэт орой бүр цэнхэр дэлгэцээр тантай учирдаг.

Одоогоос 20 орчим жилийн өмнө шилмэл загвар зохион бүтээх товчоонд загвар өмсөгчөөр ажиллаж нарийн бичиг Дунгаамаа даргын нүдэнд өртөн миссийн тэмцээнд оролцож дэд миссээр тодорч байсан нэгэн. Харин загварын ертөнцөд Түвшин агсан түүнийг хөтөлж оруулсан гэдэг. Өдгөө түүнийг хүн бүхэн "Загварын акул"-аас эхлэн "Эрчүүдийн ангууч" гэх хүртэл нь А, Б гүй мэддэг гэж болно.

Гэхдээ түүний дотоод сэтгэлийг мэддэг нь мэдээж харьцангуй цөөн. Яагаад гэвэл тэр зожиг бас дотогшоо зантай бүрэг нэгэн. 18 хан насандаа багш нь байсан эрийн өвөрт очиж, мисс болсноосоо хойш энэ өршөөлгүй салбарыг карьер болгон хөөх үед нь нөхөр нь бяцхан охиноо аван түүнээс салснаас хойш өнөөдрийг хүртэл тэрээр ямагт бусдын тэр тусмаа эрчүүдийн анхааралд явсан гэхэд болно.

Ямартаа өнгөрсөн жил нэгэн сэтгүүлийн газраас зохион байгуулсан хүсэмжит 10 бүсгүй буюу амтлаг арвын тэргүүн магнайгаар тодорч байхав. Түүний тухай гоо сайхны хагалгаанд орсон, нэг ч цаг улсад хөдөлмөрлөж үзээгүй, хамгийн өндөр үнэтэй хүүхэн гэгчлэн олон таагүй яриа сонстдог ч тэр яах аргагүй хамгийн эмэгтэйлэг загвар өмсөгч. Түүний намбалаг хэрнээ аальгүй гэмээр төрх эрчүүдийг төдийгүй хүүхнүүдийг ч галзуурахад хүргэж мэднэ. Түүнтэй нэр холбогдсон эрчүүдийн нэрсийг бичнэ гэвэл багагүй ч хугацаа шаардах биз.

Өдгөө тэрээр АПУ-ийн гэгддэг Батжавтай нэг гэрт амьдарч байгаа. Ямар ч байсан олон эрийн хувьд харахын заяа байхаас хазахын заяа алга гэгддэг энэ бүсгүй 40 насны босгыг алхсан ч нялх охидтой зэрэгцэн загварын тайзнаа алхаж яваа нь бахархал билээ.

Болормаа хамгийн хөдөлмөрч топ
Одгэрэлийн адил загварын ертөнцөд өнөө хүртэл зуун хувь хүлээн зөвшөөрөгдөж чадахгүй байгаа ч тэрээр энэ л салбартаа үнэнч гэдгээ харуулан  "Монгол модель" агентлагийг амжилттай ажиллуулж яваа.

Могой гурав тасравч гүрвэлийн дайтай гэгчээр хэдий залуу цагийнх шигээ цойлохгүй ч хааяахан энд тэндхийн шоун дээр топ хэвээрээ л байж чаддаг нэгэн. МДХ-ныхонтой муудалцан хэвлэлээр хэсэг баалуулсан, өөрөөсөө үе мултарсан Баярсайхан гэгч модель залуутай амрагийн холбоотой байсан, анхны нөхрөөсөө салсан гээд түүний тухай ч саар мэдээ олон.

Гэхдээ энэ хүний амьдралд байдаг л зүйл. Харин сүүлийн үед үнэтэй машин бэлгэнд авч, харь эрийн кофег чанах нь гэсэн мэдээлэл цацагдах болсон ч тэрээр happy нэрт бяцхан нохойгоо эрхлүүлэн ганц бие яваа. Зарим нь түүнийг хөгширснөө бас ганцаардсанаа батлах мэт нохойгоо эрхлүүлж, нохойноос өөрийг ярихаа больж хэмээн шүүмжлэх нь бий.

Гэсэн ч загварын ертөнц даяараа түүнийг хамгийн хөдөлмөрч топ гэдгийг хүлээн зөвшөөрдөг.

Ундраа хамгийн хэнэггүй топ
22 дахь удаагаа зохиогдох гэж буй загварын наадмын хаан "Гоёл"-оос тодорсон арван топын нэг болсон тэрээр хамгийн хэнэггүй топ гэгддэг ч бас хамгийн чадварлагт нь орох нэгэн. Учир нь тэрээр өөрийн биеийн сул талаа маш сайн далдалж чаддаг.

Магад тэр хэнэггүй зангаа эвдэж чадвал өөр ч амжилтын оргилд хүрч чадах биз. Топууд дотроос дахин энэ жилийн наадамд тайзнаа гарч чадах  бэлтгэлтэй яваа хүмүүсийн нэг нь Ундраа.

Туяацэцэг өөртөө итгэлтэй топ
Загварын тайз, онгоцны бүхээг дотор олон жилийн амьдралаа өнгөрүүлсэн түүнийг өөртөө итгэлтэй, "оригоороо"  байгаа нэгэн гэж тодорхойлдог. Нэгэн үе их дэлгүүрийн урдхан, хамтран амьдарч байсан буриад залуутайгаа нийлэн кафе ажиллуулан бизнес эрхлэхийг оролдож  байсан  ч тэрээр загвар өмсөгч, онгоцны үйлчлэгч гэх хос морьдоосоо урваж чадаагүй.

Тэрээр мөн л бусдынхаа адил Дэмбэрэлцэрэн агсны хүү зэргээр хэд хэдэн хүнтэй нэр холбогдоод авсан. Харин өдгөө МХХТГ-ын хэлтсийн дарга Мөнхбаттай нэгэн хөнжилд багтах болсон. Хувийн амьдралдаа ийн өөрчлөлт хийсэн модель ажлаа ч өөрчлөн MCS компанид ажиллах болсон. Бусадтай адил тэр нүдэндээ давхраа хийлгэж, урууландаа селикон шахуулсангүй. Буриад маягийн өвөрмөц төрхөөрөө бусдаас ялгардаг. Тэр бас ямар ч үед найзархаг байж чаддаг, эршүүд ч гэмээр түс тас үгтэй.

Түүний энэ зан олон хүнд таалагддаг. Тэр ч утгаараа түүний тухай муу үг унагах хүн ховор байдаг биз. Ямар ч байсан тэрээр тайзан дээр омголон, өөртөө дэндүү итгэлтэй дүр төрхийг бусдаас илүүтэйгээр бий болгож чаддаг нэгэн.

Баярзул сюрприз барих дуртай топ
Бүжигчин мэргэжилтэй энэ бүсгүй өдгөө Монгол ньюс компанийн захирал агсан Балдоржийн хүүгийн эхнэр болон үрийг нь төрүүлээд байгаа.

Тэрээр тайзан дээр үсээ хусуулан гарч ирэх зэргээр гэнэ гэнэ цочир сюрприз барьчихдаг нэгэн. Хэд хэдэн клип төдийгүй "нимбэгтэй хараа" гэх архины рекламд хүртэл тоглож байсан. Бүжигчин мэргэжил нь түүнийг загварын тайзан дээр бусдаас ялгарахад нь ихээхэн түлхэц өгдөг байсан.

Цолмон хамгийн гоё хөл, гоё хөхтэй топ
Түүнийг загварын ертөнцийнхөн ингэж үнэлдэг. Гэсэн ч тэр энэ өршөөлгүй салбараас холдохыг. хүссэн үү сүүлийн үед өөртөө төдийлөн анхаарахаа больсон мэт харагддаг. Анх нэгэн эмч залуутай заяа холбосон ч түүнээсээ тусдаа амьдрах болсон.

Үүнээс өөрөөр "Том" гэж тодотгогддог тэрээр тэр бүр эрчүүдтэй нэр холбогдсон нь дуулддаггүй. Өдгөө тэрээр MCS компанийн харьяанд байх нэгэн рестораныг удирдан ажиллуулж байгаа

Уранцэцэг хамгийн урт хөлтэй топ
Манлай уяач Пунцагбалжир агсны хүү Энхмөнхтэй нийллээ, саллаа хэмээн байнга шахуу гэр бүлийн асуудлаа олны өмнө дэлгэх нь холгүй байдаг түүнийг ясны загвар өмсөгч гэж үнэлэх хүн олон.

Нэгэн үе Германд амьдарч байгаад ирсэн тэрээр топууд дундаа хамгийн урт хөлтэйд нь ордог бас хамгийн хүнд характертайд нь тооцогддог.

Наадмын өдрүүдэд бэлтэй хүний бүсгүй болсон гэсэн шиг түүнийхээ хамт хачин их хээ хуар болсон Монгол хувцсаар гоён олны өмнө гарч нүд хужирладаг түүнийг гоо сайхны мэс засалд орсон, ааш муутайдаа Энхмөнхөд гологдов гэхээс өөрөөр тэр бүр цоллоод байдаггүй.

Өдгөө МДХ-д гэрээт загвар өмсөгчөөр ажиллаж байгаа.

Пүрэвсүрэн жүжигчин топ
Энэ арван топ дотроос нас нь хэдий бага ч мөнхийн залуу Одгэрэлтэй эн дүйхүйцээр бичигдэх баялаг "намтар"-тай нэгэн. Арван жилийн охин байхдаа ОУ-ын чанартай тэмцээнээс фото мисс өргөмжлөл хүртэн, улмаар алтны магнат Мянганбаярын нүдэнд торж хамтын амьдралаа зохиосон нь түүнийг ийнхүү баялаг түүхтэй болгоход хүргэсэн.

Ард түмний мисс Ариунцэцэг хийгээд топ, Мянганбаяр нарын дунд өрнөсөн хайрын түүхийг хэвлэлийнхэн "Хайрын гурвалжингийн романс" гэж хүртэл нэрлээд авсан. Экс нөхрөөсөө хойш Хар хорин захын боссын хүү Цэгцбаатар гэх залуутай, сэтгэлийн холбоотой болсон  ч  тэдний үерхэл таагүй байдлаар өндөрлөж цагдаадаа хүртэл тулсныг бид мэднэ. Харин тэрээр өдгөө охиныхоо хамт аав ээжтэйгээ нам гүмхэн амьдарч байгаа. Загварынхан түүнийг ямар ч хувцсанд хувирч чаддаг жинхэнэ жүжигчин модель гэж үнэлдэг. Өөрөө ч тэрээр СУИС-ийг жүжигчин мэргэжлээр дүүргэж,  "Хувьсал харьяалагдан чамгүй олон бүтээлийн гол дүрийг бүтээн чадварлаг жүжигчин болохоо харуулсан билээ.

Харин сүүлийн үед тэрээр нэгэн телевизийн "Ододтой бүжиглэе" шоугаар сайн бүжигчин болохоо бас харуулаад байгаа билээ. Тэрээр мөн Монголд анх удаа контентийн эротик зураг авахуулах ажлын салхийг хагалан зоригтой алхам хийгээд амжсан. Өнгөрсөн жил зохион байгуулсан хүсэмжит арвын нэгд орж чадсан, өөрийгөө биш хувцсаа харуулж, түүндээ хувирч чаддаг байх ёстой алтан зарчмыг хамгийн сайн баримталдаг топ.

О.Алимаа чимээгүй топ
Топууд дундаас хамгийн чимээгүй байдаг нэгэн. Гэхдээ түүнийг сайн мэдэх нэг нь хүүхдээрээ ааштай гэж магтдаг.

Дээхэн үед даян аварга А.Сүхбатыг дэмждэгээ илэрхийлэнгээ түүнийг "Балын амт мэддэггүй эрвээхий" хэмээн хэлсэн гэдгээс үүдэн бөөн дуулиан тарьж байсан. Үүнээс өөрөөр түүний тухай барагтай бол саар яриа гардаггүй.

Хэсэг мобиком компанийн нүүр царай болж байгаад Монгол газар компанид ажиллах болсон тэрээр өдгөө сагсчин Давхарбаяртай хуримлан гэр бүлийн аз жаргалыг илүүд үзэх болсон.

Нам нам дуугаран, алхах гишгэх нь хүртэл аядуухан байдаг тэрээр чимээгүй модель гэдгээ батлах гэсэн шиг мөн л чимээгүйхэн хуримласан билээ.

О.Уянга хамгийн оюунлаг топ
Отгон топыг загварын ертөнцийнхөн ингэж тодорхойлж байна. ХУИС-ийг сэтгүүлч мэргэжлээр төгссөн тэрээр өдгөө магистрын зэрэг хамгаалахаар хилийн чанадад сурч байгаа.

"Шүрэн бугуйвч" кинонд тоглон, топын шагнал гардан авсан энэ бүсгүй энэ оны 6 сард Хятадад болсон Азийн супер модель шалгаруулах тэмцээнд оролцон 10 орны бүсгүйгээс шалгарсан нэгэн Шагналыг нь авсан бол шийтгэлийг нь хүлээ гэсэн шиг жил жилийн топ тодорсны дараа албатай юм шиг хэл ам гардаг.

Харин отгон топын хойноос ийм явдал гараагүй нь түүнийг загварынхан хийгээд үзэгчид хүлээн зөвшөөрснийх биз.