Дэлхийн хамгийн хамгийн гэсэн тодотголтой өндөр барилга, амьтан, хүн зэргийн тухай сонирхолтой мэдээллийг хүргэж байна.

Дэлхийн хамгийн өндөр загвар өмсөгч
Америкийн загвар өмсөгч Эви 205 см өндөр аж. Тэрбээр эрчүүдэд зориулсан Австралийн “Zoo Weekly” сэтгүүлд энэ зургаа авахуулжээ. Үлэмж биет загвар өмсөгч бүсгүй 162 см өндөр австрали загвар өмсөгчийн хамт сэтгүүлийн нүүрэнд гарчээ. “Бид түүнд зориулан захиалгаар усны хувцас хийлгэсэн” гэж сэтгүүлийн редактор Пол Мерилл хэлжээ.

Дэлхийн хамгийн өндөр морь
Британийн Пое Клидесдале гэдэг морь 203 см өндөр бөгөөд түүний эзэн Шерен Томсон аварга морио Гиннессийн амжилтын номд бүртгүүлэх хүсэлтэй байгаа аж. Пое 1,36 тонн жинтэй бөгөөд Гиннессийн номын одоогийн амжилтын эзнээс 20 см өндөр юм. Аварга биетэй морь өдөрт 4,5 кг өвс идэж, 283 литр ус уудаг байна.

Дэлхийн хамгийн өндөр гүүр
Британийн архитекторч Лорд Фостер болон Францын инженер Мишель Вирложеугийн загвараар бүтээсэн Миллау Виадукт гүүр автомашины замтай дэлхийн хамгийн өндөр гүүр юм. Энэ гүүр 341 метр өндөр бөгөөд Эйфелийн цамхгаас ялимгүй өндөр, Эмпайр Стэйт барилгаас 40 метр намхан аж. Энэ гүүрийг Францын өмнөд нутгийн Тарн голын хөндийд барьж, 2004 оны 12 дугаар сарын 14-нд албан ёсоор нээсэн байна.

Дэлхийн хамгийн өндөр өсгийтэй гутал
Дэлхийн хамгийн өндөр өсгийтэй гутлын өсгий нь 40,64 см, өлмий хэсгийн улны зузаан нь 27,94 см аж. Та ийм өндөр өсгийтэй гутал өмсвөл хэр өндөр болох бол. Дундаж өндөртэй эмэгтэй энэ гутлыг өмсвөл мэргэжлийн сагсан бөмбөгийн тоглогчоос ч өндөр болно.

Дэлхийн хамгийн өндөр барилга
Арабын Нэгдсэн Эмирт Улсын Бурж Дубай цамхаг 818 метр бөгөөд хүний гараар бүтсэн дэлхийн хамгийн өндөр байгууламж юм. Дэлхийн хамгийн өндөр цамхгийн барилгын ажлыг 2004 оны есдүгээр сарын 21-нд эхэлж, 2010 оны нэгдүгээр сарын 4-нд нээжээ.  Тэнгэр баганадсан барилга 50 метр зузаан,110 мянган тонн жинтэй суурин дээрх 192 багана дээр тогтож байна. Тус барилгыг барихад 230 мянган шоо метр бетон, 39 мянган тонн ган, 142 мянган шоо метр шил, ажлын 22 сая цаг зарцуулжээ. Барилгын гадна хэсгийг хэмжээгээрээ хөлбөмбөгийн 17 талбайтай тэнцэх 22 мянган шилэн хавтангаар бүржээ.

Дэлхийн хамгийн өндөр цасан хүн
Дэлхийн хамгийн өндөр цасан хүн бол мэдээж амьд хүн биш. Цасан хүний цамхгийг Америкийн Мэн муж улсын тосгонд босгосон байна. Аварга том цасан хүний сормуусыг цанаар урласан бол амыг нь улаан будгаар будсан машины дугуйгаар хийжээ. 37,1 метр өндөр цас хүний ороолт нь 30,4 метр урт аж. Тосгоны оршин суугчид уг цасан хүнийг Мэн муж улсын сенатч асан Олимпийн нэрээр нэрлэсэн байна. Аварга том цасан хүн Эрх чөлөөний хөшөөнөөс /46 метр/  9,14 метр намхан аж.

Дэлхийн хамгийн өндөр лего цамхаг
Америкчууд дэлхийн хамгийн өндөр лего /угсардаг тоглоом/ цамхгийн шинэ дээд амжилт тогтоожээ. Далайн дээрэмчдийн хөлөг онгоцны 28,7 метр өндөр шурагийг босгоход 465 мянган ширхэг тоглоом оржээ.

Дэлхийн хамгийн өндөр усан оргилуур
Бурж Дубай цамхгийн усан оргилуур хамгийн өндөрт усаа цацдаг. Усан оргилуур 150 метр өндөр буюу бараг 50 давхар байшинтай тэнцэх өндөрт усаа цацдаг байна. Үүнийг бүтээхэд 217 сая доллар зарцуулжээ. Үүнээс гадна усан оргилуур 6600 гэрэлтэй, 50 төрлийн өнгө цацруулагчтай аж.

Дэлхийн хамгийн өндөр нохой
Дэлхийн хамгийн өндөр нохой Титан 115 см өндөр бөгөөд 86 кг жинтэй аж. Дөрвөн настай, Грит Дэне үүлдрийн энэ нохой дэлхийн хамгийн өндөр нохой ч гэлээ хараагүй, дүлий гэнэ. Түүнийг эзэн нь гадуур дагуулж явахад багачууд хараад үхэр, морь хэмээн андуурдаг байна.

Дэлхийн хамгийн өндөр мод
Америкийн Калифорни муж улсын ойгоос улаан мод олсон бөгөөд үүнийг дэлхийн хамгийн өндөр мод гэж бүртгэсэн байна. Хайперион гэж нэрлэсэн энэ мод 116 метр өндөр аж. Калифорни муж улсын Улаан мод дархан цаазат газарт ийм төрлийн мод хамгийн олон байдаг.

С.Отгонбаяр