Өнгөрсөн зун NBА-ын драфтын №1-ээр ч нэрлэгдэх боломжтой байсан Харрисон Барнес өөрийн Хойд Каролинагийн сургуульд үлдсэндээ баяртай байгаагаа мэдэгдлээ.

Тэрээр мэргэжлийн сагсан бөмбөгийн улирлаа эхлүүлэх биш, сургуульдаа үлдэхийг илүүд үзэж олон сая доллар олох боломжоо цааш түлхсэн ч одоо харамсах зүйлгүй шийдвэр гаргаснаа бахдан хэлж байна.

Тэрээр:
-“Би NBА-д орсон ангийнхаа бүх найзуудынхаа өмнөөс баярлаж байсан... Гэвч одоо тэд гэртээ сууж NBА эхлэх нь үү үгүй юу гэдгийг харан сууж байна” хэмээн Yahoo-д ярилцлага өгчээ.

Түүнчлэн:
-“Энэ нь тэдэнд хүнд байгаа болов уу. Тэдэнд сургуульдаа үлдэж дахин нэг улирал тоглох боломж байсан” хэмээн ярьжээ.

NBА-ын ажил хаялттай байгаа энэ байдал түүний андууд болох Кайри Ирвин, Жарэд Саллинжэр, Тристан Томпсон зэрэг NBА-ын драфтуудад хүндээр тусч байгаа нь ойлгомжтой юм. Гэхдээ энэ байдал бий болно гэдгийг хэн нь төсөөлөх вэ.

Харин Барнесийн хувьд 1986 оноос хойш Бүх Америкийн багт багтсан тоглогчдоос NBА-д орох боломжоосоо татгалзсан анхны хүн болсон ба өнгөрсөн улирал 15.7 оноо дунджаар авч, 5.8 самбараас бөмбөг авалт гүйцэтгэж Тар Хийлс багаа сүүлийн 19 тоглолтын 17-д нь ялалт байгуулахад туслаж байжээ.

Юутай ч тэрээр гаргасан шийдвэртээ харамсаж байгаагүйгээ хэлээд:
-“Коллежийн сагсан бөмбөгийн лиг 11 сарын 11-нд эхэлнэ. Үүнд ямар нэг локоутын асуудал байхгүй. Би үнэхээр сэтгэл хангалуун байна” хэмээн ярилцлагаа өндөрлүүлсэн ажээ.

Г.Зол-Эрдэнэ