Эрүүл мэндийн яамнаас мэдээлэл хийж байна. 

​ЭМЯ-ны Гадаад харилцаа, хамтын ажиллагааны газрын дарга Б.Янжмаа, ОХУ-д өчигдөр 8900 гаруй тохиолдол нэмж бүртгэгдэж, 467 мянгад хүрч, нийт нас баралт 5800 гаруй хүрлээ. БНСУ-д өчигдөр 38 тохиолдол нэмж бүртгэгдсэнээс 33 нь отоодын буюу хүн амны дундах халдвар байжээ. Тус улсад баасан гарагт 51, бямба гарагт 57 шинэ тохиолдол бүртгэгдсэн. 

ХӨСҮТ-ийн ерөнхий захирал Д.Нямхүү, Зургаадугаар сарын 7-ны өдөр 46 хүнд шинжилгээ хийснээс 45-д нь вирус илрээгүй. ОХУ-аас ирсэн олон улсын ачаа тээврийн жолооч 38 настай эрэгтэй хүнээс коронавирус илэрсэн. Жолоочийн биеийн байдал хэвийн. Өнөөдөр Сэлэнгэ аймгаас ХӨСҮТ рүү авчирч эмчилнэ. Энэ жолооч Монголд анх удаа ирсэн. 

Монголд коронавирусийн халдварын 194 дэх тохиолдол бүртгэгдсэнээс 75 хүн эдгэрч эмнэлгээс гарлаа. 119 хүнд эмчилгээ хийж байна. 

ОХУ-аас Алтанбулагийн боомтоор ирж буй олон улсын тээврийн жолооч нарын шинжилгээг Дархан-Уул аймгийн лабораторид хийж байгаа. Жолооч нар бүхээгтээ нэг нэгээрээ явж байгаа ба бүхээгээс буухгүй байх журамтай. ОХУ-аас анх удаа ирсэн хоёр жолоочоос коронавирус илэрлээ. Жолооч нар ХӨСҮТ-д тусгаарлагдан, эмчилгээ хийнэ гэлээ.