Шүүхийн нэр, шийдвэрийн дугаар: 2024.11.11 001/ХТ2024/0109

Тоймын дугаар, огноо: №53 /ЗХТ-21/ 2024.11.11

Шийдвэрийн төлөв: Хүчин төгөлдөр болсон.

Иргэн П.Х нь иргэний үнэмлэхээ хаяж, дахин иргэний үнэмлэх авахаар Улсын бүртгэлийн байгууллагад ханджээ. Гэтэл улсын бүртгэлээс “улсын бүртгэлийн тогтоосон журам зөрчсөн” гэж, 30000 төгрөгийн торгууль төлсний дараа шинэ үнэмлэх олгоно гэжээ.

Харин иргэн Иргэн П.Х нь иргэний үнэмлэхээ гээсэн үед торгууль төлөх нь буруу хэмээн үзэж шүүхэд ханджээ.

Прокурор шүүхэд гаргасан дүгнэлтдээ: “... Иргэн өөрөө иргэний үнэмлэхээ гээгдүүлсэн, үрэгдүүлсэн үйлдэл, эс үйлдэхүй нь тухайн журамд хамааралгүй, хариуцлага хүлээх үндэслэлгүй, иргэний үнэмлэхийг ашиглаж байгаа иргэн биш, харин хуульд заасан ажил үүргээ гүйцэтгэх явцдаа бусдын иргэний үнэмлэхийг хариуцаж байгаад гээсэн, үрэгдүүлсэн, түүний хүчинтэй байдлыг алдагдуулсан тохиолдолд захиргааны хариуцлага хүлээлгэхээр зохицуулсан” гэж, улсын бүртгэгчээс “... иргэний үнэмлэх бүртгэлийн дүрмийг хуулийн нэгдсэн сайтад бүртгүүлсэн, нийтээр дагаж мөрдөх эрх зүйн акт гэж үзсэн, иргэд иргэний үнэмлэхээ хадгалах эзэмших үүрэгтэй, захиргааны зөрчил мөн” гэж тус тус маргажээ.

Хяналтын шатны шүүхээс шийтгэлийн хуудсыг хүчингүй болгож, иргэний үнэмлэхээ хаясан тохиолдолд торгууль төлөх хууль зүйн үндэслэлгүй гэж үзэв.

Монгол Улсын иргэний үнэмлэхийн дүрэм нь бүхэлдээ нийтийн эрх зүйн харилцааг зохицуулаагүй, ялангуяа энэ маргааны үндэслэл болсон “2.7.1” дэх заалт нь гадагш чиглэсэн, нийтийн эрх зүйн дагавар үүсгэсэн хэм хэмжээ биш, иргэний үнэмлэхээ үрэгдүүлэх нь зөвхөн хувь иргэнд эрх зүйн үр дагавар учруулах болохоос олон нийтэд эрх зүйн үр дагавар учруулахгүй, нийтээр тогтоосон журам, зан заншлын хэм хэмжээнд сөргөөр нөлөөлөхгүй юм.

Тоймыг бэлтгэсэн: Улсын дээд шүүхийн шүүгч П.Соёл-Эрдэнэ