Дэлхийн удирдагчдын уур амьсгалын тухай дээд түвшний уулзалт үргэлжилж байна. 160 гаруй улсаас цугласан төрийн тэргүүн, салбарын сайд төлөөлөгчид НҮБ-ын индрээс байр сууриа илэрхийлж, өнгөрсөн хугацаанд өгсөн амлалтын хэрэгжилтийг танилцуулж буй.

Бага хурлын хүрээнд хэлэлцэж буй асуудлаар Ерөнхийлөгчийн Байгаль орчин, ногоон хөгжлийн бодлогын зөвлөх Н.Батхүүгээс дараах тодруулгыг авлаа.

Тэрбээр "Конвенцын зүгээс 2009 оноос эхэлж яригдсан "Уур амьсгалын санхүүжилтийг нэмэгдүүлэх" тэр дундаа хөгжиж буй орнуудад энэ төрлийн санхүүжилтийг өсгөх шаардлагатай гэх олон талт ярианы хүрээнд хэлэлцээрүүд хэрэгжиж байна.

Дэлхийн удирдагчдын уур амьсгалын тухай дээд түвшний уулзалт өнөөдрөөс эхлэн хоёр өдөр үргэлжлэх юм. Энэ үеэр дэлхийн удирдагчид улс орныхоо байр суурийг НҮБ-ын индрээс илэрхийлдэг.

Монгол Улсын ерөнхийлөгч өнөөдөр “Монгол Улсын уур амьсгалын өөрчлөлт ба түүнийг сааруулах, сөрөг нөлөөллийг бууруулах, дасан зохицох болон эх орондоо уур амьсгалын өөрчлөлттэй холбоотой ямар ажил хийж хэрэгжүүлж буй” талаараа байр сууриа илэрхийлэн хуралдаанд оролцоно.

ТАЛУУДЫН БАГА ХУРЛААР

НҮБ-ын суурь конвенцын хуралдаан, Киотогийн протокол, Парисын хэлэлцээрийн талуудын хуралдааныг хийхээс гадна шинжлэх ухаан технологийн хурал болон конвенцын хэрэгжилтийг хангах олон улсын хорооны хуралдаанд олон талт гэрээ хэлэлцээр хийдэг.

Үүнд Монгол Улсыг төлөөлөн төрийн захиргааны байгууллагууд, хувийн хэвшил, иргэний нийгмийн байгууллага, залуучуудын төлөөлөл тодорхой чиглэлийн дагуу оролцож буй. Уулзалтаар олон талт хэлэлцээрийн үйл ажиллагаа эрчимжиж байна.

Хуралдаанаас гарах үр дүнг арваннэгдүгээр сарын 22-нд талууд бүрэн хүлээн авч, ажлаа дүгнэнэ.

УУР АМЬСГАЛЫН ӨӨРЧЛӨЛТИЙН 29 ДҮГЭЭР ХУРЛЫН ОНЦЛОГ

2022 оныг хүртэл уур амьсгалын өөрчлөлтийг бууруулах хүрээнд хөгжингүй болон хөгжиж буй орнуудад үзүүлэх санхүүжилтийн хэмжээг 100 тэрбум хүргэх амлалтыг авч хэрэгжүүлж байна.

Энэ жилийн санхүүжилтийн тайлангийн дүнгээс харвал 118 орчим тэрбумыг хөгжиж байгаа орнуудад үзүүлэх юм.

Улс орон болгон уур амьсгалын өөрчлөлтийг сааруулах чиглэлд үндэсний хэрэгцээ шаардлагыг тооцоолсон дүнгээ Уур амьсгалын конвенцын нарийн бичгийн дарга нарын газарт хүргүүлж, нэгдсэн байдлаар энэ удаагийн хурал дээр ярьж байна.

Санхүүжилтийн хэмжээг тооцоолбол тэрбумаар бус их наядаар тоологдох ам.доллар улс орнуудад хэрэгтэй юм байна.

Энэ удаагийн COP 29-ын үр дүнд санхүүжилтийн шинэ зорилгыг батална гэдэгт оролцогч талууд бүрэн итгэлтэй байна. Гэхдээ 14 хоногийн хэлэлцээрийн эцсээр нэгдсэн дүн тодорхой болох нь ойлгомжтой.

Монгол Улсын хувьд хоёр жил тутам уур амьсгалын өөрчлөлтийн ил тод байдлын тайлан гаргадаг. Үүнийгээ өнгөрсөн онд албан ёсоор хүргүүлсэн.

Монгол Улсын хувьд үндэсний тодорхойлсон хувь нэмрийнхээ хүрээнд 2030 он хүртэл хүлэмжийн хийн ялгарлыг 22.7 хувиар бууруулах амлалтыг авч ажиллаж байгаа.

Улмаар 2050 он хүртэл дэлхийн хэмжээний нийтлэг хандлагын хүрээнд хүлэмжийн хийн ялгарлыг тэглэх зорилтыг тавьж ажиллаж байна.

Бид хүлэмжийн хийн ялгарлаа бууруулах амлалтаа биелүүлэх хүрээнд хөдөө аж ахуй, эрчим хүчний салбартаа гол анхаарлаа хандуулах ёстой.

Энэ хүрээнд ирэх оны хоёрдугаар сар хүртэлх хугацаанд улс орон болгон өөрийн орны үндэсний тодорхойлсон хувь нэмрээ ахиулан баримт бичгийг Нарийн бичгийн Уур амьсгалын конвенцын дарга нарын газарт хүргүүлэх даалгавартай.

Бид хүлэмжийн хийн ялгарлаа бууруулах амлалтаа биелүүлэх хүрээнд хөдөө аж ахуй, эрчим хүчний салбартаа гол анхаарлаа хандуулах ёстой.

Тэр утгаараа Монгол Улсын Засгийн газрын үйл ажиллагааны хөтөлбөр, төлөвлөгөөнд сэргээгдэх эрчим хүчний асуудлыг төлөвлөн хэрэгжилтийн шатанд явж байгаа.

Нөгөө талаас хөдөө аж ахуйгаас ялгарах ялгарлын хэмжээнд онцгойлон анхаарах шаардлага бий. Мөн манай улс газар ашиглалт болон газар ашиглалтын өөрчлөлтийг бууруулах боломжтой.

Ойн сангаа хамгаалах болон нөхөн сэргээх чиглэлээр дасан зохицох үйл ажиллагааны хүрээнд хүлэмжийн хийн шингээлтийг нэмэгдүүлэх боломж зэргийг голчлон анхаарч байгаа.

Дэлхийн дундаж буюу 44 хувь хүртэлх хэмжээнд хүлэмжийн хийн ялгарлаа бууруулах амлалтаа биелүүлэх арга хэмжээг төлөвлөх, түүнийг хэрэгжүүлэх үйл ажиллагааны төлөвлөгөөг батлан гаргах ёстой болж буй" хэмээн ярилаа.