Ази тивийн улс орнууд Шинэ жилийн баяраа өөр өөрийн онцлогтойгоор тэмдэглэдэг. Нийтлэг уламжлал нь 12 амьтдаар жил бүрийг төлөөлүүлж, ахмад настнаа хүндэтгэн, гэр бүлээрээ цуглардаг баяр. Хятад, Солонгос, Япон, Вьетнам зэрэг улс хэрхэн тэмдэглэдэг талаарх мэдээллийг хүргэе.

Монголчуудын хувьд Сар шинийн баяр буюу “Цагаан сар” нь өвлийг үдэж, шинэ хаврыг угтан авах онцгой ач холбогдолтой баяр юм. Монголчууд баярын өмнөх оройг "Битүүн" хэмээн нэрлэж, гэр бүлээрээ нийлж, бууз, ууц, цагаан идээтэй зоог барин, муу бүхнээ өнгөрсөн онд үлдээхийг бэлэгддэг. Шинийн нэгний өглөө хүмүүс эртлэн босож мөргөө гаргаж, ахмад буурлууддаа очин золгож, хөөрөг зөрүүлэн мэндчилж, тэднээс ерөөл сонсдог. Мөн айл өрхүүд зочдодоо бэлэг бэлэглэх бөгөөд энэ нь хайр хүндэтгэл, элбэг дэлбэг байдлыг бэлэгддэг. Баярын үеэр цагаан идээ, өрөм, ааруул, сүүтэй цай тэргүүтэй ариун цагаан идээ ундаа зонхилдог нь шинэ оны ариун цагаан өнгөөр эхлүүлэхийг илэрхийлдэг.

Хятадад Сар шинийн баярыг "Хаврын баяр" хэмээн нэрлэж, жил бүрийн нэгдүгээр сарын сүүл, хоёрдугаар сарын эхээр тэмдэглэдэг. Энэ үеэр гэр бүлээрээ цугларч, баярын зоог барин бууз, загас зэрэг хоол иддэг. Настай хүмүүс хүүхэд, залууст аз хийморийг нь бэлэгддэг улаан дугтуйтай мөнгө өгч, гэр бүлийн гишүүд шинэ оны ерөөлөө хэлэлцдэг. Мөн баярын гол зан үйл болох галын наадам хийж, муу ёрын сүнснүүдийг үргээнэ хэмээн сэтгэж арслан болон луун бүжиг хийдэг.  Энэ үед хүмүүс сүмд очиж залбирах бөгөөд тухайн жилд ямар амьтан тохиож байгаагаас хамаарч шинэ оны өнгийг тодорхойлдог уламжлалтай. Сонирхуулахад хятадууд энэ жилийн Хаврын баяраа нэгдүгээр сарын 29-нд тэмдэглэжээ.

Солонгосчуудын хувьд Сар шинийн баярыг "Сольнал" хэмээн нэрлэдэг бөгөөд энэ нь өвөг дээдсээ хүндэтгэх, гэр бүлээрээ цуглаж баяр тэмдэглэх өдөр юм. Хамгийн чухал зан үйл нь "Чарёе" хэмээх тахил өргөх ёслол бөгөөд энэ үеэр төрөл садангууд цуглан, талийгаач өвөг дээдэстээ зориулж тусгай ширээ засдаг. Баярын гол хоол нь будааны зутан буюу "Ттокгүг" бөгөөд үүнийг идсэн хүн нэг нас нэмдэг хэмээн үздэг. Хүүхдүүд болон залуус ахмадуудад мэхийн ёсолсноор хариуд нь ерөөл сонсож, мөнгө бэлгэнд авдаг. Энэ баярын үеэр мөн гэр бүлээрээ "Ютнори" гэх уламжлалт ширээний тоглоом тоглон цагийг хөгжилтэй өнгөрүүлдэг байна.

Япончуудын хувьд Сар шинийн баярыг бусад Азийн орнуудтай адил сарны хуанлигаар бус, нарны хуанлигаар тооцон нэгдүгээр сарын 1-нд тэмдэглэдэг онцлогтой. "Шёгатсу" хэмээх энэ баяраар хүмүүс шинэ жилийг эрүүл энх, элбэг хангалуун угтахын тулд тусгай утга билэгдэл бүхий хоолнуудыг модон хайрцагт хийж идэх бөгөөд үүнийг "Осэчи Рёори" гэж нэрлэдэг. Японд мөн "Мочицүки" хэмээх будаа нүдэх зан үйл өргөн дэлгэрсэн бөгөөд энэ нь шинэ оны баярын ширээнд зориулан мочи буюу будааны боов бэлтгэх уламжлал юм. Жил бүрийн эхний өдрүүдэд хүмүүс "Хацүмодэ" буюу жилийн эхний сүмд мөргөх ёслолд оролцож, шинэ оноо аз хийморьтой угтдаг. Харин хүүхдүүд ахмадуудаасаа "Отосидама" буюу дугтуйтай мөнгө хүлээн авдаг нь баярын нэгэн чухал уламжлал билээ.

Вьетнамд Сар шинийн баярыг "Тэт" хэмээн нэрлэж, өвөг дээдэстээ өргөл барих, гэр бүлээрээ баяр тэмдэглэх зан үйл өргөн дэлгэрчээ. Энэ баяраар вьетнамчууд "Бан Чунг" болон "Бан Тэт" гэх будааны боов хийж, гэр бүлээрээ ширээн тойрон сууж иддэг. Хятадын адил арслангийн бүжиг, салют буудуулах зан үйл өргөн дэлгэрсэн бөгөөд энэ нь муу бүхнээ үлдээж, шинэ оныг аз жаргалтай эхлүүлэх гэсэн утгатай. Түүнчлэн ахмад хүмүүс хүүхдүүддээ "Ли Си" буюу улаан дугтуйтай мөнгө өгч, ирж буй жилийн ерөөлийг айлддаг.

Хэдийгээр улс орон бүрийн уламжлал өөр боловч Сар шинийн баяр нь ахмад настнаа хүндэтгэх, гэр бүлээ дээдлэх, ерөөл хүсэх, элбэг дэлбэг байдлыг бэлэгдэх гэсэн нийтлэг үнэт зүйлсийг агуулсан баяр юм.