Их Монгол улс байгуулагдсаны 802, ардын хувьсгалын 87 жилийн ойн их баяр наадмыг Франц Улсад аж төрж буй монголчууд гурав дахь удаагаа дэлгэр сайхан тэмдэглэлээ. Францын монголчуудын наадам Парис хотын ойролцоо Шату Бурэ-д болсон бөгөөд Парис, Лион, Руан, Орлеан зэрэг хотоос гадна Бельги, Швейцарь оронд аж төрж буй монголчууд хүрэлцэн ирж оролцлоо.

Наадмыг нээж Монгол Улсаас БНФрУ-д суугаа Онц бөгөөд Бүрэн эрхт Элчин сайд Р.Алтангэрэл хэлэхдээ "... Парис дахь Элчин сайдын яам эх орон нэгтнийхээ эцэг эх, ахан дүүсийг төлөөлөн хариуцлагатай ариун үүргээ умарталгүй, чанд сахихийг чармайн ажиллаж ирлээ. Монгол Францын харилцаа өдрөөс өдөрт өргөжиж, түүхээ улам зузаатгасаар байна. Энэ оны эхний хагаст Монгол Улсын Засгийн газрын дөрвөн гишүүн айлчилсны дотор Гадаад хэргийн сайд анх удаа айлчилсан нь түүхэн ач холбогдолтой арга хэмжээ боллоо. Мөн манай улс Монакогийн Хант улстай дипломат харилцаа тогтоож анхны Элчин сайдаа томилов. Испаний Зарагоза хотноо болж буй дэлхийн 150 гаруй орон оролцож байгаа олон улсын Экспо үзэсгэлэнд Монгол Улс амжилттай оролцож байна. Энэ бүхэн маань монгол орноо улам дэлгэр хөгжүүлэхэд бидний оруулж буй хувь нэмэр билээ. Энхрий харйт монгол нутаг минь, санаа заяа нь өөдөө, ухаант монгол түмний минь хйиморь үеийн үед мандан бадарч, тэнгэр заяат монголчууд нүүрэндээ галтай, нүдэндээ цогтой, зүрхэндээ баяртай байхыг хүсэн ерөөе" гэж баяр наадмыг нээж үг хэлэв.

Наадамд эр бяр тэгширсэн хүчит 64 бөх зодоглов. Мөн монголчуудын эртний уламжлалт шагайн харваж цэц мэргэнээ сорьсон юм. Баяр наадамд ардын авьяастан залуус ая дуугаа өргөж наадмын уухай нэмлээ.