НҮБ-ын Ерөнхий ассамблейн ээлжит 63 дугаар чуулган өчигдөр Нью-Йорк байрладаг төв байрандаа ажлаа эхэллээ. Латин Америк, Карибын тэнгисийн орнуудын бүс нутгийн бүлэг хамтарч чуулганы даргаар Никарагуагийн Гадаад хэргийн сайд асан Мигель д'Эското Брокмани сонгожээ. Чуулганы явцад 160 төрлийн асуудлыг хэлэлцэх юм. Үүнд энх тайвныг хамгаалж, аюулгүй байдлыг хангах, алан хядах ажиллагаатай тэмцэх, хүний эрх, хүрээлэн буй орчныг хамгаалах, нийгмийн болон эдийн засгийн асуудлуудыг хөндөх гэнэ. Уламжлалт ёсоор шинэ чуулганы хүрээнд улс төрийн ерөнхий асуудлаар мэтгэлцээн явуулах юм. Мэтгэлцээн энэ сарын 23-наас аравдугаар сарын 1-ний хооронд явагдах бөгөөд 120 гаруй орны төрийн болон Засгийн газрын тэргүүн нар оролцох юм. Чуулганы явцад НҮБ-ын Аюулгүйн Зөвлөлийн бүтцийг шинэчлэх, тус байгууллагын үйл ажиллагааг идэвхжүүлэх, мөн ДОХ-той тэмцэх асуудал гээд урьд нь хэлэлцэж байсан асуудлуудыг үргэлжлүүлэх гэнэ. Улс төрийн мэтгэл­цээний анхны өдөр болох үед Ерөнхий ассамблейн индэрт Бразил, АНУ, Франц, Серб, Аргентин, Иран зэрэг орны Ерөнхийлөгч нар үг хэлэх юм. Чуулган болохын зэрэгцээ НҮБ-ын төв байранд мянган жилийн тунхаг­лалаар баталсан хөгжлийн зорилт ололтыг дүгнэхэд зориулсан дээд хэмжээний арга хэмжээг зохион байгуулах гэнэ.

Ерөнхий ассамблей нь НҮБ-ын гол байгууллага бөгөөд одоо 192 гишүүнтэй. 1946 онд түүний бүрэлдэхүүнд 51 улс багтай байжээ. Өнгөрсөн 60 жилийн хугацаанд тус байгууллага хэлэлцэх асуудлынхаа хүрээг тэлж, мөн хүүхэд эмэгтэйчүүдийн эрхийг хамгаалах, ардчилал, авлига, хууль бусаар хар тамхи наймаалах гээд олон асуудлыг хөндөх болсон юм.