Хойд Америкийн үндэсний сагсан бөмбөгийн холбооны плэйоффын тоглолтууд үзэгч биднийг гайхшруулж алмайруулж, сэтгэл хөдлөлөөр дүүрэн сонирхолтой өрнөж аваргын төлөө өрсөлдөх хоёр баг тодорсон билээ.

Өрнөд бүсээс Голдэн Стэйт Уорриорс баг тав дахь жилдээ дараалан NBA шигшээ цувралд шалгарсан бол Дорнод бүсээс Торонто Рэпторс багийнхаа түүхэнд анх удаа NBA шигшээ цувралд шалгарсан юм.

Голдэн Стэйт Уорриорс баг плэйоффын эхний шатанд Лос Анжелес Клиппэрс багийг зургаан тоглолтод ( 4-2 ) буулган авсан бол хоёр дахь шатанд Хьюстон Рокетс багийг мөн л зургаан тоглолтод ( 4-2 ) буулган авсан. Харин бүсийн шигшээ цувралд Портлэнд Трэйл Блэйзерс багийг 4:0 шүүрдэж шигшээ цувралд шалгарсан билээ.

Торонто Рэпторс багийн хувьд эхний шатанд Орландо Мэжик багийг таван тоглолтод ( 4-1 ) хожсон бол хоёр дахь шатанд Филадельфиа 76 багтай маш хүнд тоглолтыг хийж долоон тоглолтод ( 4-3 ) хожиж бүсийн шигшээ цувралд шалгарсан. “Кавай Леонардын гайхалтай хожлын шидэлтийг яахан мартах билээ”. Харин бүсийн шигшээ цувралд Милоуки Бакс багтай таарсан бөгөөд эхний хоёр тоглолтод хожигдсон ч дөрөв дараалан хожсоноор ( 4-2 ) харьцаатай буулган авч 1995 онд байгуулагдсан Торонто Рэпторс баг түүхэндээ анх удаа шигшээ цувралд шалгарсан юм.

Улаанбаатарын цагаар шигшээ цуврал 05 сарын 31-нд Торонто Рэпторс багийн талбайд эхлэх бөгөөд дараагийн тоглолт ч мөн Рэпторсын талбайд явагдах хуваарьтай билээ.

• Шигшээ цувралын тоглолт 1: 05 сарын 31 Торонто Рэпторс багийн талбай
• Шигшээ цувралын тоглолт 2: 06 сарын 03 Торонто Рэпторс багийн талбай
• Шигшээ цувралын тоглолт 3: 06 сарын 06 Голдэн Стэйт Уорриорс багийн талбай
• Шигшээ цувралын тоглолт 4: 06 сарын 08 Голдэн Стэйт Уорриорс багийн талбай
• Шигшээ цувралын тоглолт 5: 06 сарын 11 Торонто Рэпторс багийн талбай
• Шигшээ цувралын тоглолт 6: 06 сарын 14 Голдэн Стэйт Уорриорс багийн талбай
• Шигшээ цувралын тоглолт 7: 06 сарын 17 Торонто Рэпторс багийн талбай

Сүүлийн таван жилд дөрвөн удаа аваргын цомыг өргөж, хоёр жил дараалан аварга аваад буй Голдэн Стэйт Уорриорс баг шигшээ цувралд илүүрхэх магадлал өндөр байгаа боловч Кэвин Дурант, Дэмаркус Казинс нар шигшээ цувралыг өнжих магадлал өндөр байна. Тэгвэл Торонто Рэпторс баг цувралын эхний хоёр тоглолтыг талбайдаа хийх бөгөөд энэ хоёр тоглолтод хожиж чадвал аварга авах боломж нээгдэх юм.

2019 оны NBA шигшээ цувралыг SPS Үндэс болон SPS сагсан бөмбөг сувгаар шууд дамжуулан хүргэнэ.

П.Хатансайхан