Хууль зүй, дотоод хэргийн яамны ажилтнууд Шангрила зочид буудалд 7 сая төгрөгийн хоол идсэн гэх мэдээлэл гарчээ. Энэ талаар тус яамны Төрийн захиргаа, удирдлагын газрын дарга Д.Жанчивдорж товч тайлбар хийв.

Тэрбээр, Манай яамныхан долоон сая төгрөгийн хоол идсэн юм байхгүй. Та бүхэн яамны шилэн данс руу орж үзвэл мэдээлэл нь байгаа. Цааш нь тодруулаад үзвэл,  Вьетнам улсын Нийгмийг аюулаас хамгаалах яамны сайд 35 хүний бүрэлдэхүүнтэйгээр Монголд ажлын айлчлал хийсэн.

Айлчлалын хүрээнд хоёр орны хооронд ялтан шилжүүлэх гэрээг үзэглэх болон  бусад асуудлыг хэлэлцлээ. Айлчлалын бүрэлдэхүүн өдөр, оройн зоог барих хүлээн авалтыг Шангрила зочид буудалд зохион байгуулсан. Зөвхөн манай яамны гүйлгээг харахад ийм байгаа бол цааш нь ухаад ямар зориулалттай арга хэмжээ байсныг хэвлэл мэдээллийнхэн түгээсэнгүй” гэв.