"Stranger Things" киноны жүжигчин 21 настай Милли Бобби Браун болон түүний нөхөр 23 настай Жейк Бонжови хоёр хүүхэд өргөж авснаа зарлажээ. 

“Энэ зун бид хайртай бяцхан охиноо өргөж авсан” хэмээн хосууд инстаграмдаа хамтарсан мэдэгдэл бичжээ. “Амьдралын дараагийн бүлэг, эцэг эх байх үеэ бид тайван бөгөөд хувийн орон зайгаа чухалчлан эхлүүлж байгаадаа туйлын баяртай байна. Тийм ээ, бид гурвуулаа боллоо" гэжээ. 

Тэд хоёр жил үерхээд 2024 онд гэр бүл болсон. Милли Браун сүүлийн жилүүдэд гэр бүлтэй болох хүслээ нээлттэй ярьж ирсэн. Энэ оны гуравдугаар сард ч тэрээр Бонжовитой хамт амьдралынхаа дараагийн бүлгийг эхлүүлэх гэж буйдаа баяртай байгаагаа онцолж байв.

Надад бол өөрийн төрсөн хүүхэдтэй болох эсвэл хүүхэд үрчилж авах хоёрын хооронд онцын ялгаа байхгүй гэж боддог

“Ээж маань 21-тэйдээ, аав маань 19-тэйдээ анх хүүхэдтэй болж байсан. Энэ бол би Жейктэй таарахаас ч өмнө хүсэж ирсэн зүйл. Би багаасаа л ээждээ "Би хүүхэлдэй биш жинхэнэ хүүхэдтэй болохыг хүсэж байна, ээж шигээ ээж болохыг хүсэж байна" гэдэг байсан” хэмээн Милли Браун нэгэн подкастад ярьжээ.

Тэр үргэлжлүүлэн “Миний эмээ ч амьдралд минь асар их нөлөө үзүүлсэн. Тиймээс  миний хувьд энэ ямар чухал болохыг Жейк сайн мэднэ. Мэдээж жүжигчин, продюсерийн хувьд өөрийгөө бүрэн дайчлах нь чухал, гэхдээ хувийн амьдралд буюу гэр бүлтэй болох нь ч бас үнэхээр том зүйл. Жейк хэлэхдээ "Бид гэрлэж байж л хүүхэдтэй болно" гэдэг байсан” гэжээ. 

Домогт дуучин Жон Бон Жовигийн хүү Жейк болон Милли Браун хоёр хоёулаа эхээс дөрвүүлээ тул өнөр өтгөн гэр бүлтэй болохыг хүсэж буйгаа илэрхийлээд "Надад бол өөрийн төрсөн хүүхэдтэй болох эсвэл хүүхэд үрчилж авах хоёрын хооронд онцын ялгаа байхгүй гэж боддог" гэж Милли хэлжээ. 

Эх сурвалж: www.usmagazine.com