АНУ-ын Сенатын парламентын шүүгч Элизабет МакДонаф хэмээх эмэгтэй Трампын төсвийн хуулийн төслийг эсэргүүцсэнээр олны анхааралд өртөж эхэллээ.

Парламентын шүүгчийн үүрэг нь хуулийн төсөл төсвийн дэг журамд нийцэж байгаа эсэхийг хянах. МакДонаф энэ албан тушаалд ажиллах анхны эмэгтэй болсон юм.

Трампын ихэд олзуурхаж "Big beautiful bill" хэмээн нэрлээд буй 1000 хуудаснаас бүрдэх энэ хуулийн төсөл нь төсвийн зардлыг танаж, татварын хөнгөлөлтийг сунгах зорилготой юм.

Гэвч МакДонаф хуулийн зарим заалт нь Сенатын дэг журмыг зөрчиж байна гэж үзсэн бөгөөд энэ нь хэдэн тэрбум ам.долларын төсвийн таналтыг эргэлзээтэй болгожээ.

Трамп энэ хуулийн төсвийг ирэх сарын 4-ний өдрөөс өмнө батлуулахаар зорьж байгаа ч МакДонафын энэ дүгнэлт үүнд саад болж мэдэхээр байна.

МакДонафын үзсэнээр уг хуулийн төслийн хэд хэдэн заалт 1985 онд Сенатын баталсан “Бёрдийн дүрэм”-ийг зөрчиж байгаа аж.

Өөрөөр хэлбэл тус дүрэмд тэнцвэржүүлэх хуулийн төслүүд нь төрийн мөнгийг хэрхэн зарцуулах талаар чиглэл өгөхөөс биш бодлого тодорхойлох ёсгүй гэж заажээ.

Бүгд найрамдах намын зарим гишүүд МакДонафын дүгнэлтийг эсэргүүцэж, түүнийг ажлаас нь халах ёстой ч гэж шаардаж байна. Харин Сенатын зарим гишүүд уг дүгнэлтийг дэмжиж энэ хуулийн төслийг өөрчлөх боломж гэж харж байгаа аж. 

Сенатын гишүүд санал нэгдэж чадахгүй байгаагийн улмаас долоодугаар сарын 4 буюу АНУ-ын тусгаар тогтнолын өдрөөр уг хуулийн төслийг батлах Трампын зорилт биелэх эсэх нь тодорхойгүй байна. 

Эх сурвалж: ВВС