Д витамин нь ясны бат бөх байдал, дархлааны систем, булчингийн үйл ажиллагааг дэмжихэд чухал ач холбогдолтой.

Д витамин нь хүний эрүүл мэндэд бидний төсөөлснөөс ч олон эерэг нөлөө үзүүлдгийг эрдэмтэд судалж тогтоожээ. Тухайлбал өмнө нь Д аминдэмийг зөвхөн бага насны хүүхдийн рахитын үед хэрэглэдэг гэсэн ойлголт байсан бол өнөө цагт цус харвалт, зүрхний шигдээс, чихрийн шижин өвчнөөс урьдчилан сэргийлэх, тэр ч байтугай хавдрын эсрэг өндөр үр дүн үзүүлдэг аж.

Хүн бие арьсаараа дамжуулан нарнаас Д витаминыг авч болох ч бидний амьдралын хэв маяг /орон сууц, нарнаас хамгаалах тос гэх мэт/, газар зүйн байршил зэрэг нь шаардлагатай хэмжээнд авахад саад учруулдаг. Дээрх шалтгаануудын улмаас Монгол Улсын хүн амын ихэнх нь буюу ойролцоогоор 10 хүн тутмын 9 нь Д аминдэмийн дутагдалтай байдгийг судлаачид тогтоосон байна. Иймээс Д витаминыг нэмэлтээр хэрэглэх зайлшгүй шаардлагатай юм.

Д витаминыг:

Нарны гэрлээр авах:  Байгалийн эх үүсвэрээс Д витаминыг авахыг хүсвэл нарны гэрэлд багахан хугацаагаар байх хэрэгтэй.. Өдөрт 10-30 минут нарны шууд гэрэлд байх нь хангалттай байдаг.

Хоол хүнсээр авах: Д витаминаар баялаг хоол хүнс хэрэглэж болно. Үүнд тослог загас (яргай, хулд), өндөгний шар, сүү, сүүн бүтээгдэхүүн, мөөг зэрэг орно.

Нэмэлтээр авах: Нар болон хоол хүнснээс хангалттай хэмжээгээр авч чадахгүй бол эмчийн заавраар Д витамин агуулсан нэмэлт бүтээгдэхүүн хэрэглэж болно.

Тухайлбал, Д витамины тун нь хүний нас, эрүүл мэндийн байдал, Д витамины түвшин зэргээс хамаарч өөр өөр байдаг. Ердийн зөвлөмжийн дагуу дараах тунгаар хэрэглэнэ:

• Нярай болон бага насны хүүхэд (0-12 сар): Өдөрт 400-600 ОУН (Олон Улсын Нэгж)
• 1-18 насныхан: Өдөрт 600-1000 ОУН
• Насанд хүрэгчид (18 ба түүнээс дээш): Өдөрт 800-2000 ОУН.
• Ахмад настнуудад (65-аас дээш) 1000-2000 ОУН хэрэглэхийг зөвлөдөг, учир нь тэдний D витамины дутагдал илүү түгээмэл байдаг.
• Жирэмсэн болон хөхүүл эхчүүд: Өдөрт 800-2000 ОУН. Гэхдээ эмчтэйгээ зөвлөлдөөрэй.