Казахстаны геологичид улсынхаа нутаг дэвсгэрээс 20 сая тонн боломжит нөөц бүхий газрын ховор элементийн томоохон орд илрүүлсэн байна.

"Жана Казахстан" хэмээн нэрлээд буй тус орд нь нийслэл Астана хотоос 420 км зайд, Караганда мужийн нутагт оршдог. 300 орчим метрийн гүнээс неодим, церий, лантан, иттригийн нөөц илрүүлсэн бөгөөд тонн тутамд дунджаар 700 грамм газрын ховор элементийн агуулга байна гэж тооцоолсныг тус улсын Аж үйлдвэр, бүтээн байгуулалтын яам мэдээлжээ.

АНУ-ын Геологийн албанаас гаргасан газрын ховор элементийн нөөц бүхий орнуудын жагсаалтад Казахстан одоогоор багтдаггүй. Хэрэв шинэ ордын нөөцийн хэмжээг баталгаажуулбал Казахстан улс газрын ховрын нийт нөөцөөр БНХАУ, Бразилын дараа гуравдугаарт бичигдэх юм.

Хайгуулыг Төрийн санхүүжилттэй хөтөлбөрөөр хийсэн бөгөөд ордын хөгжүүлэлт хэзээнээс эхлэх, ямар компани хариуцах талаар одоогоор тодорхой болоогүй байгаа аж.

С.Бат-Очир