Улаанбаатар дахь нийт оффисуудын 80 хувь нь Их тойруугийн бүсэд байна.

Гудамж замын сүлжээний нягтрал нэг га газарт 350-450 хүн байх стандарттай ч Улаанбаатар хотын зарим хэсэгт, тэр тусмаа хотын төвийн хэсгээр энэ нягтаршил гурав дахин нэмэгдсэн байгааг ШУТИС-ийн Барилга Архитектурын Сургуулийн Хот байгуулалтын салбарын эрхлэгч, Хот төлөвлөлтийн профессор Э.Пүрэв-Эрдэнэ мэдээллээ.

Дэд бүтцийн хангамж хангалтгүй байсан нь хотын төв рүү бизнесүүд төвлөрөх, хүн амын нягтаршил нэмэгдэх шалтгаануудын нэг болж байгааг тэрбээр онцолж байна.

Хотын аль хэсэгт хэр өндөр барилга баригдах талаар тодорхойлолт байдаггүй нь оффисууд нэг дор олноор баригдах бас нэг шалтгаан болж байгааг дурдлаа.

Нийт оффисуудын 80 хувь нь Их тойруугийн бүсэд байдаг талаар “MMCG” компанийн судалгаанаас харж болохоор байна. Мөн хоёр хүн тутмын нэг нь ажилдаа явах зорилгоор Их тойруугийн бүс рүү ордог гэж тус судалгаанд тодотгожээ.

Монгол Улсад хотжилт эрчимтэй нэмэгдэж, суурин газрын хүн амын нягтаршил Зүүн Азийн бүс нутгийн дунджаас давсан байгааг Дэлхийн банкнаас мэдээлж байв.

2000 онд Монгол Улсын нийт хүн амын 57 хувь нь хот суурин газар амьдарч байсан бол 2022 оны байдлаар 69 хувь болж өсөөд байгаа юм.