Америкийн ойрын зайн шилдэг гүйгч Тайсон Гэй Олон улсын хөнгөн атлетикийн холбооноос гаргасан дүрмийн өөрчлөлтийг эсэргүүцэж байна. Уг өөрчлөлтөөр ирэх улирлаас эхлэн гүйгч гараанаас дохио өгөхийн өмнө гарсан эхний тохиолдолд л шууд хасагдахаар болжээ.

Тайсон Гэй "Энэ өөрчлөлт хөнгөн атлетикийн хөгжилд сайнаар нөлөөлнө гэж бодохгүй байна. Ингэснээр хөгжөөн дэмжигчид мөнгө төлж цэнгэлдэхэд ирэх нь ямар ч утгагүй болно. Тэд жинхэнэ хүчитнүүдийн тулааныг үзэх гэж л ирдэг. Би бусадтай адил жирийн л хүн. Ямар ч хүн алдаа гаргадаг. Тийм учраас шинэ дүрэм тамирчдын сэтгэл зүйд хортойгоор нөлөөлөх болно.. Гарааны өмнө тэд хасагдахгүйн тулд яаж алдаа гаргахгүй байх талаараа л бодно. Яагаад ч энэ өөрчлөлтийг зөвшөөрч чадахгүй нь. Тамирчдын бүтэн жилийн турш хийсэн шаргуй бэлтгэл сургуулилт ганц алдаа гаргасны төлөө л байхгүй болно гэсэн үг" гэжээ.

Гэтэл Тайсон Гэйгийн гол өрсөлдөгч олимпийн гурван удаагийн аварга Усэйн Болт энэ өөрчлөлтийг тийм ч айгаад байх зүйл биш хэмээн үзэж байна. Тэрбээр "Шинэ дүрмийн заалт айгаад байх зүйл биш. Хэн нэгэнд таалагдахгүй байж магадгүй, гэхдээ миний л хувьд биш. Шинэ дүрэм хөнгөн атлетикийн хөгжилд сайнаар нөлөөлнө" гэсэн аж.

С.Баяр