Сургууль, цэцэрлэгийн зориулалттай газрыг Нийслэлийн Засаг даргын захирамжаар байгуулагдсан ажлын хэсгийн гишүүд “Зочид буудал барих” болгон өөрчилснийг баримттайгаар мэдээлж, оршин суугчдын төлөөлөл болон улсаа аврах ард түмний хөдөлгөөнөөс хэвлэлийн бага хурал хийж байна.

“Улсаа аврах ард түмний үндэсний хөдөлгөөн” болон “Богд ар” хорооллын сууц өмчлөгчдийн зүгээс мэдээлэл хийж байна.

“Богд ар” хорооллыг барих, бүтээн байгуулалтын жишиг хороолол болгох захирамжийн дагуу тус хороолол баригдаж эхэлсэн. Ингээд үүнийг дагасан 6000 гаруй айл болон сургууль цэцэрлэгийг барих зураг төсөл баталсан. Гэтэл хорооллыг нь ашиглалтад оруулсан хэрнээ сургууль, цэцэрлэгийг барихгүй үлдээсэн. Өнөөдрийг хүртэл хойшлуулсаар байна. Энэ асуудлыг 20 жилийн дараа “Богда холдинг” компани эзэмшин “миний эзэмшлийн газар, худалдаж ав” гэсэн хариулт өгч байна.

Хүүхдийн сурч боловсрол эрхийг зөрчиж байгааг эсэргүүцэж байна. Тийм ч учраас Хотын дарга С.Амарсайханд шаардлага хүргүүлж байна. “Богда холдинг” компани өөрийн эрх ашигт дүйцүүлэн зочид буудал, үйлчилгээний газар барихыг зогсоох хэрэгтэй. Төр төмөр нүүрээ үзүүлэх цаг болсон. Төрийн газрыг буцаагаад өөрт нь зардаг, нийтийн эрх ашгийг хөндсөн үйл ажиллагааг болиулах шаардлагатай.

20 жилийн өмнө “Богда холдинг” компани 930 гаруй хүүхдийн сургууль, 200 гаруй хүүхдийн цэцэрлэг барина гэсэн ч өнөөдөр ямар байдалтай байгааг бид харж байна. 

Холбогдох хүмүүст шаардлага хүргүүлсэн ч хариу өгөхгүй байна. Үүний ард ашиг сонирхлын зөрчил бий. Үүнийг таслан зогсоох шаардлагатай. Үе үеийн засаг дарга нар ингэж шийдээгүй. Оршин суугчдын эрхийг ханга гэж шийдсэн. Тэдний хүчинд энэ газар хадгалагдан үлдсэн. Гэтэл С.Амарсайхан дарга хоёр хувааж байна.

Хуулийн үндэслэлтэйгээр тухайн газар самбар байрлуулж санал авах ёстой ч үүнийг гүйцэлдүүлээгүй. “Улсаа аврах ард түмний үндэсний хөдөлгөөн” болон “Богд ар” хорооллын сууц өмчлөгчдийн зүгээс энэ гомдлыг шийдэж өгөхгүй бол АТГ, захиргааны хэргийн шүүхэд хандана гэдгээ мэдэгдэв.