Монгол улсад жилдээ 1,5 сая тонн хог хаягдал гардгаас 24 хувь буюу 344 тонн хогийг дахин боловсруулдаг. Гэтэл нийт хог хаягдлын 85 хувь нь дахин боловсруулах боломжтой хог хаягдал байдаг.

Хог хаягдлын тухай хуульд 2017 онд оруулсан өөрчлөлтөөр “Хог хаягдлын боловсрол” гэх бүлгийг нэмжээ. Хог хаягдлын боловсрол гэдэг нь иргэд, аж ахуй нэгжүүд хогийг хэрхэн эх үүсвэр дээр нь бууруулах, ангилан ялгах талаар тодорхой ойлголттой болж, үүнийг дадал зуршил болгох явдал юм.

Захирагчийн ажлын албанаас идэвх санаачлага бүхий 100 гаруй СӨХ, хороодод Хогийг эх үүсвэр дээр ангилан ялгах төсөл хөтөлбөрийг хэрэгжүүлсэн

Сүүлийн үед хог хаягдлыг ангилах, дахин боловсруулах ажлын хүрээнд баталсан журам, төслүүдийн талаар Улаанбаатар хотын Захирагчийн ажлын албаны Хог хаягдлын удирдлага зохицуулалтын хэлтсийн дарга С.Аригун “Энэ оны хоёрдугаар сарын 20-ны өдөр “Хог хаягдлыг цэвэрлэх, цуглуулах, ангилах, дахин боловсруулах, сэргээн ашиглах” журам баталсан. Энэ журамд дүүрэг бүрийн ТҮК компани гурван машин тутмын нэгийг ангилсан хог хаягдал тээвэрлэх тусгай зориулалтын машин байна хэмээн заасан. Үүний эхлэл болгон энэ жилийн хог тээврийн авто машины шинэчлэлээр ангилсан хог хаягдал тээвэрлэхээр арван машиныг дүүргүүдэд тарааж өгсөн. Мөн Захирагчийн ажлын албанаас идэвх санаачлага бүхий 100 гаруй СӨХ, хороодод Хогийг эх үүсвэр дээр ангилан ялгах төсөл хөтөлбөрийг хэрэгжүүлсэн. Эдгээр СӨХ, хороо, аж ахуй нэгжээс цаас, шил, хуванцар зэргийг тус тусад нь ачдаг дөрвөн машин ажиллаж, хэвшил тогтсон“ хэмээлээ.

Улаанбаатар хотын ерөнхий менежерийн тушаалаар хүнсний хог хаягдлыг дахин боловсруулах ажлын хэсгийг байгуулж, хоол үйлдвэрлэлийн чиглэлээр ажилладаг байгууллагуудаас гарч буй хоолны хаягдал болон малын гаралтай хаягдлыг боловсруулж бордоо болгох төслийг мөн эхлүүлжээ.

Хог хаягдал дахин боловсруулах 34 үйлдвэр, үүнээс байнгын идэвхтэй үйл ажиллагаа явуулж буй 18 үйлдвэр байна

Улаанбаатар хотын Захирагчийн ажлын албаны Хог хаягдлын удирдлага зохицуулалтын хэлтсийн Эрүүл мэнд, нийгмийн бодлогын хүрээлэнгийн захирал А.Нямдорж өөрийн илтгэлдээ “Хогоо ангилан хаяснаар дахин боловсруулах хогны хэмжээ ихсэж, амьдрах орчин сайжирна, байгалийн бохирдол болон хог хаягдлын хэмжээ буурах гэх мэт олон давуу талтай. Одоогийн байдлаар хог хаягдал дахин боловсруулах 34 үйлдвэр, үүнээс байнгын идэвхтэй үйл ажиллагаа явуулж буй 18 үйлдвэр байна. Энэ үйлдвэрүүдэд хамгийн чухал зүйл нь түүхий эд буюу дахин боловсруулах боломжтой хог хаягдал юм. Тиймээс иргэд мэдлэгтэй байж хогоо ангилан хаях хэрэгтэй” хэмээн дурдлаа.

Улаанбаатар хотын Захирагчийн ажлын албанаас аравдугаар сард хог хаягдлыг ангилан хаях мэдээллийг иргэдэд өгөх нөлөөллийн ажлуудыг хийх юм байна.

Б.Энхмарал