Ямар нэгэн бүлэг хакерууд Америкийн Боловсон хүчний албын системд нэвтэрч одоо ажиллаж байгаа болон өмнө нь ажиллаж байсан 4 сая төрийн албан хаагчдын мэдээллийг хулгайлжээ.

Халдлагыг Хятадаас хийсэн гэж таамаглаж байгаа бөгөөд зөвхөн Боловсон хүчний алба бус Дотоод хэргийн яамны мэдээллийн санд нэвтэрсэн байж болзошгүй гэж үзэж байгаа юм байна.

Нью Йорк Таймст бичсэнээр энэхүү халдлагыг зохион байгуулагчид нь өмнө нь Anthem, Primera компаниуд руу халдаж байсан бүлэг байж магадгүй аж. Америкийн төрийн байгууллагууд бүгд л EINSTEIN гэх хяналтын системийг ашигладаг юм байна.

Энэ систем нь сүлжээний орчинд болж буй бүхнийг хянахын сацуу зөвшөөрөлгүй нэвтэрсэн тохиолдлыг бүртгэж мэдээлж байдаг аж. Өнгөрсөн дөрөвдүгээр сард Боловсон хүчний алба руу мөн халдах гэж байсныг энэ систем илрүүлж байжээ.

Гэвч энэ удаад EINSTEIN халдлагыг эрт илрүүлж чадсангүй. Тэрчлэн систем яагаад ийм алдаа гаргасан болохыг тодруулж чадаагүй байгаа юм байна. Харин одоо Боловсон хүчний алба хувийн мэдээлэл нь алдагдсан дөрвөн сая хүнд өөрсдийгөө хэрхэн болзошгүй аюулаас сэргийлэх тухай заавар, анхааруулгыг хүргэхээр ажиллаж байгаа аж.

Эх сурвалж: 

Гэрэл зургийн эх сурвалж: technewstoday.com