Жил бүрийн арванхоёрдугаар сарын 31-нд “Алтан сарнай” наадмын шагналтнууд шалгардаг. МАН-ын дэргэдэх Нийгмийн ардчилал, залуучуудын холбооноос энэ наадмыг зохион байгуулдаг бөгөөд энэ жилийнх 14 дэх удаагийнх юм.

Нийгэм, эдийн засгийн бүхий л салбараас шилдгийг шалгаруулдаг “Алтан сарнай”-н эздийг дараах долоон номинациар шалгарууллаа.

-Шинжлэх ухааны салбарын онц онцлох хүн үндэсний тоглоомын зохион бүтээгч З. Түмэн-Өлзий.

-Соёл урлагийн салбарын оны онцлох хүнээр Н.Жигжиддорж шалгарсан юм. Тэрээр Морин хуур чуулгын гоцлол хөгжимчин, морин хуурч бөгөөд “Арга билиг” хамтлагийн гишүүн юм байна. Урлагийн салбарын шилдгийн шилдгүүдийг шалгаруулдаг Медуза наадмаас мөн л шилдгийн шилдэг нь болж байжээ.

-Спортын салбарын оны онцлох хүн -С.Цэрэнчимэд.

Тэрээр Узбек улсын Ташкент хотноо болсон чөлөөт бөхийн дэлхийн аваргын тэмцээний 60 кг-ын жинд аваргын алтан медаль, “Их дуулга”-ын алт, армийн дэлхийн аварга, Инчеоны Азийн наадмаас хүрэл медаль хүртсэн зэрэг бахдам амжилтууд үзүүлсэн юм. Мөн 19 насандаа Монгол Улсын гавьяат тамирчин цолоор шагнуулсан юм.  

-Энэрэнгүй үйлс, хүмүүнлэгийн оны онцлох хүн Ажиа Гэгээн.

Тэрээр цусны хорт хавдартай хүүхдүүдэд зориулан иж бүрэн эмнэлгийг өнгөрсөн наймдугаар сард ашиглалтад оруулсан юм. 2009 онд 18 хүүхдэд цусны хорт хавдартай гэсэн онош тавьсан бол 2011 онд 33 болж өсчээ.

Иймд тэдэнд зориулсан эмнэлэг барих нь манай улсад тулгамдсан асуудал байсан юм. Монгол түмэн түүнд талархах учиртай гээд энэрэнгүй үйлсийн эзнээр шалгаруулжээ.  Түүний шагналыг шавь нь болох Б.Батбаяр гардан авсан юм.          

Нийгэм улстөрийн салбарын оны онцлох хүнээр МАН-ын Ерөнхий нарийн бичгийн дарга, яруу найрагч Ж. Мөнхбат шалгарсан юм.

“Алтан сарнай”  наадмын үеэр жил бүр  Дэлхийн Монгол хүнийг шалгаруулдаг.

Шонхор циркийн захирал Г.Баатархүү энэ шагналын эзэн болсон юм. Тэрээр БНСУ-ын Чэжү арал дахь Морьтон монголчуудын хамтлагт 10 орчим жил ажилласан уран бүтээлч хүн бөгөөд нийт 15 сая хүнд үзүүлбэрээ үзүүлжээ.  Түүний Монгол соёлыг дэлхий дахинд дахинд сурталчан таниулж буй гавьяаг үнэлж, Дэлхийн хүнээр өргөмжилжээ.

Эдийн засаг бизнесийн салбарын оны хүнээр Говь ХК-ийн Тэргүүн дэд захирал  Д.Наранбаатар шалгарлаа.

Мөн Н.Хажидсүрэн, Д.Нармандах, Ц.Амарсанаа, Э.Ганхуяг, Л.Ганболд нарыг “Нийгмийн ардчилал”-ын төлөөх цомоор шагнасан юм.